ललितपुर : नगर क्षेत्रमा कुनै पनि सरकारी अस्पताल नभएको अवस्थामा ललितपुर महानगरपालिकाले नगर अस्पताल निर्माण गर्ने भएको छ।

महानगरपालिकाको वडा नं. २७ मा रहेको सार्वजनिक जग्गामा अस्पताल निर्माण गर्ने योजना भएको महानगरका प्रवक्ता राजु महर्जनले जानकारी दिए। उनका अनुसार त्यो स्थानमा झण्डै १७ रोपनी खाली जग्गा खाली भएकाले अस्पताल निर्माण सम्भाव्यता अध्ययन भइरहेको छ।

अस्पताल निर्माणका लागि महानगरले जग्गा पहिचान गरिसकेको छ। यो वर्ष अस्पताल निर्माण गर्ने स्थान निर्णय भइसकेपछि आगामी वर्ष बजेट छुट्याउने महानगरपालिकाले जनाएको छ।

ललितपुर उपमहानगरपालिका भएदेखि नै यहाँ सरकारी अस्पताल नहुँदा नगरवासी प्राथमिक स्वास्थ्य केन्द्र वा काठमाडौंका सरकारी अस्पतालमा जाने गरेका थिए।

ललितपुरमा लामो समयसम्म जिल्ला अस्पताल नभएपछि अघिल्लो वर्ष मात्रै गोदावरी नगरपालिकाको स्वास्थ्य केन्द्रमा जिल्ला अस्पताल सारिएको थियो।