काठमाडौं : बारा र पर्सामा हावाहुरीकाे प्रकाेपसँगै देखिएकाे रगत अभावलाई मध्यनजर गर्दै चितवनमा रक्तदान कार्यक्रम गरिएको छ। कानु समाज चितवनको आयोजनामा शुक्रबार शहीदचोकमा कार्यक्रम गरिएको हाे।

‘रक्तदान गर्न हुँदैन’ भन्ने मधेसी समुदायमा रहेको भ्रम चिर्न कार्यक्रम गरिएको समाजका सचिव रञ्जन साहले बताए। ‘मधेसी समुदायमा रक्तदान खासै गर्ने चलन नै छैन’,उनले भने, ‘देशलाई संकट परेका बेला हामीले पनि सहयोग गर्न खोजेका हौँ।’

भरतपुर महानगरपालिका ३ का अध्यक्ष चन्द्रमित्र पण्डितको प्रमुख आतिथ्यमा भएको कार्यक्रममा कानु समाज चितवनका अध्यक्ष राजकुमार साह लगायत विभिन्न संस्थाका प्रतिनिधि सहभागी थिए। कार्यक्रममा १८ महिला सहित १ सय १५ जनाले रक्तदान गरेको बताइएको छ। रक्तदानका लागि नेपाल रेडक्रस सोसाइटी रक्त सञ्चार केन्द्र क्षेत्रिय कार्यालय चितवनले प्राविधिक सहयोग गरेको थियो।