हेल्थ टिभी अनलाइन : क्यान्सर बिजेताहरुले क्यान्सर एउटा रोग मात्र भएको र यसलाई जित्न सकिने हुँदा क्यान्सरलाई मृत्युका रुपमा हेर्न नहुने बताएका छन्। नेपाल क्यान्सर सभाईभर्स सोसाइटीले ‘नेशनल क्यान्सर सर्भाइभर्स डे’ का दिन आयोजना गरेको छलफल कार्यक्रममा उनीहरुले यस्तो बताएका हुन् ।

८० जना भन्दा बढी क्यान्सर बिजेताहरु एउटै थलोमा भेला भएर आ आफना उपचार अनुभव सुनाउँदै क्यान्सर जित्नका लागि आत्मबल, समयमै उपचार र परिवारको दरिलो साथ चाहिने बताए । कार्यक्रममा सोसाइटीकी अध्यक्ष प्रमिता खनालले आफूहरुले छिटै केही मागसहित सरकार समक्ष ज्ञापनपत्र बुझाउने समेत जानकारी दिइन । उनले क्यान्सर बिरामीका लागि औषधिमा छुट, यातायातमा सुविधा, छुट्टै परिचय पत्र लगायतका माग सहितको ज्ञापनपत्र बुझाउन लागिएको जिकीर गरिन ।

कार्यक्रममा क्यान्सरलाई जितेर प्रेरणादायी काम गरेको भन्दै साइकल यात्री ध्रुवप्रसाद हुमागाईंलाई दोसल्ला ओढाएर सम्मान गरिएको थियो। कार्यक्रममा क्यान्सर बिजेताहरुले आफूले कसरी क्यान्सर जितेर सक्रिय जिवन जिइरहेको छु भन्ने अनुभव साटासाट गरेका थिए भने नाचगान समेत गरेका थिए ।