हेल्थ टिभी अनलाइन : विश्व मुख स्वास्थ्य दिवसमा किष्ट शिक्षण अस्पतालले जनचेतनामूलक कार्यक्रम गर्दै मनाएको छ । स्वस्थ मुख, स्वस्थ जीवन भन्ने सन्देशलाई केन्द्रमा राख्दै आयोजना गरिएको उक्त कार्यक्रमले सर्वसाधारणमा मुख स्वास्थ्यप्रति सचेतना अभिवृद्धि गर्न महत्वपूर्ण योगदान पुर्याउने अस्पतालले जनाएको छ ।

कार्यक्रम अन्तर्गत आयोजित र्यालीमा विद्यार्थी, स्वास्थ्यकर्मी तथा सर्वसाधारणको उत्साहजनक सहभागिता रहेको थियो । यस माध्यमबाट सर्वसाधारणमा मुखको स्वास्थ्य कायम राख्न र समस्या भईहालेमा जटिल हुन नदिई समयमै उपचार सेवा लिन सु–सूचित गरिएको थियो । साथै, डेन्टल प्रदर्शनी मार्फत मुख तथा दन्त स्वास्थ्यसम्बन्धी जानकारी प्रदान गरिएको थियो भने कला प्रतियोगिताले बालबालिकाहरूको सृजनात्मक प्रतिभालाई उजागर गरेको थियो ।

यसैगरी कार्यक्रमलाई थप आकर्षक बनाउन फ्ल्यास मोब फेस पेन्टिङ विभिन्न खेलकुद गतिविधिहरू तथा सन्देशमूलक नाटक समेत प्रस्तुत गरिएको थियो, जसले सहभागीहरूलाई मनोरञ्जनका साथै शिक्षाप्रद अनुभव प्रदान गरेको थियो । अस्पतालले विश्व मुख स्वास्थ्य दिवसको अवसर पारेर एक महिनाका लागि डेन्टल उपचारमा २५ प्रतिशत तथा दाँत मिलाउने उपचारमा १५ प्रतिशत छुट दिने बताएको छ ।