हेल्थ टिभी अनलाइन : प्राकृतिक चिकित्सामा छुट्टै नाम बनाउन सफल सुस्वास्थ अस्पतालले आफनो स्थापनाको १० औं वार्षिकोत्सव मनाएको छ ।

यो १० वर्षमा १८ हजार भन्दा बढी बिरामीलाई सेवा दिइसकेको अस्पतालले झण्डै ८ हजार बिरामीलाई भने निशुल्क सेवा प्रदान गरेको अस्पतालका अध्यक्ष एवम वरिष्ठ अकुपंचरिष्ट सुदर्शन बस्नेतले बताए । उनले भने, ‘सुस्वास्थ अस्पतालले सामाजिक उत्तरदायित्व अन्तर्गत हालसम्म ८ हजार बढी बिरामीलाई विभिन्न शिविरहरुमार्फत निशुल्क सेवा दिइसकेको छ ।’ उनले आगामी दिनमा पनि यो कार्यलाई निरन्तरता दिने समेत प्रतिवद्धता जनाए ।

विक्रम संवत २०५६ सालदेखि सञ्चालनमा आएको वैकल्पिक उपचार सेवा केन्द्रकोे विस्तारित रुप हो, सुस्वास्थ अस्पताल । सुस्वास्थले औषधिविहिन प्राकृतिक र समग्र उपचार पद्धतिमार्फत नागरिकलाई स्वस्थ जीवनतर्फ उन्मुख गराउने उद्देश्यका साथ आफ्ना पाइला अघि बढाइरहेको छ । प्राकृतिक चिकित्सा, अकुपंचर र फिजियोथेरापीलाई एकीकृत रुपमा प्रयोग गदै रोगीलाई निको पार्नु मात्र होइन रोग नलागेका व्यक्तिलाई पनि पूर्ण स्वास्थ्यको अनुभूति गराउनु हाम्रो मूल ध्येय हो अध्यक्ष बस्नेतले थपे ।

अस्पताल स्थापनाको सुरुवातकै समयमा महाभूकम्प त्यसपछि नाकाबन्दी र केही समय पछि कोभिड–१९ महामारीजस्ता चुनौतीपूर्ण समयलाई पार गरेको यस अस्पतालले प्राकृतिक चिकित्सा, अकुपञ्चर र फिजियोथेरापी सेवामा आफूलाई स्थापित गर्न सफल भएको छ ।

अध्यक्ष बस्नेतले बिरामीको विश्वास, स्वास्थ्यकर्मीको समर्पण र सहयोगी संस्थाको साथ नै संस्थाको प्रमुख शक्ति भएको बताएका छन्। पछिल्लो पटक ताइवानका विश्वविद्यालयसँगको सहकार्य, विदेशी इन्टर्नशीप, विशेष किसिमका तालिम तथा आधुनिक चिकित्सकको सेवा थपिनुले सुस्वास्थलाई थप सुदृढ बनाएको छ उनले थपे ।

हाडजोर्नीं, नशा च्यापिएका, प्यारालाइसिस भएका, माइग्रेन लगायतका बिरामीको प्रमख रोजाइको अस्पताल बन्न सफल सुस्वास्थ अस्पतालमा हाल ३४ जना दक्ष जनशक्ति रहेका छन्।