हेल्थ टिभी अनलाइन : काठमाडौंको कालिमाटीस्थित स्पार्क हेल्थ होम अस्पतालमा शनिबार नि:शुल्क स्वास्थ्य शिविर सम्पन्न भएको छ ।

काठमाडौं महानगरको वडा नं १३ र १४ सँगको सहकार्यमा अस्पतालले हाडजोर्नी तथा नशासम्बन्धी शिविर सञ्चालन गरेको हो । अस्पताल प्रांगणमा बिहान ८ बजेदेखि ३ बजेसम्म चलेको नि:शुल्क शिविरमा ८० भन्दा बढी बिरामीले नि:शुल्क सेवा लिएको अस्पतालका निर्देशक रुपेश अधिकारीले जानकारी दिए । उनले भने, ‘सामाजिक उत्तरदायित्व अन्तर्गत प्रत्येक वर्ष हामीले यस खालको विशिष्टिकृत सेवासहितको नि:शुल्क शिविर गर्दै आएका छौं । यसबाट धेरै बिरामी लाभान्वित हुने हाम्रो विश्वास छ ।’

विशेषगरी हड्डी खिइएका,नशा च्यापिएका, प्यारालाइसिस, ढाड दुख्नेलगायत समस्या भएका बिरामीले यस शिविरबाट लाभ लिएका थिए । सेवा दिनका लागि अस्पतालका प्राकृतिक चिकित्सक डा गिता केसी, वरिष्ठ फिजियोथेरापिष्ट अनिल महतो लगायतको टोली खटिएको थियो ।

शिविरमा प्रयोगशाला परीक्षण, एक्सरे, भिडियो एक्सरे, इसिजि, ईको आदिमा विशेष छुट समेत प्रदान गरिएको थियो ।