हेल्थ टिभी अनलाइन : भारतको दिल्लीस्थित इन्द्रप्रस्थ अपोलो अस्पतालले आफ्नो सेवा सुविधा तथा नयाँ प्रविधीका बारेमा जानकारी दिन काठमाडौंमा पत्रकार सम्मेलनको आयोजना गरेको छ ।

ग्यास्ट्रोएन्टेरोलोजी र न्युरोलोजी उपचारका क्षेत्रमा पछिल्लोपटक भएका विकास र प्रविधिबारे जानकारी दिन नयाँ अपोलोले काठमाडौंमा पत्रकार सम्मेलन आयोजना गरेको हो । शनिबार आयोजित कार्यक्रममा अस्पतालका वरिष्ठ चिकित्सकहरूले आफ्ना आफ्ना क्षेत्रका उपलब्धि र नयाँ उपचार प्रविधिबारे विस्तृत जानकारी दिएका थिए ।

अस्पतालका कन्सल्टेन्ट ग्यास्ट्रोएन्टेरोलोजी तथा हेपाटोलोजी डा संजय सिक्काले अस्पतालले पाचन प्रणाली, कलेजो र प्यान्क्रियाससम्बन्धी उपचारमा पछिल्ला वर्षमा महत्त्वपूर्ण उपलब्धि हासिल गरेको जानकारी दिए । उनले भने, ‘हामीले बिरामीको रोगको सटीक निदान, छिटो उपचार र दीर्घकालीन स्वास्थ्य सुधारलाई लक्षित गर्दै उच्चस्तरीय उपचार प्रविधि र नवीनतम विधिहरू अपनाएका छौँ ।’ डा सिक्काले आफनो अस्पतालले गुणस्तरीय सेवामा कुनै कन्जुस्याइँ नगर्ने पनि जिकीर गरे ।

यसैगरी अस्पतालका न्युरोलोजी विभागका वरिष्ठ कन्सल्टेन्ट डा पीएन रेनजेनले न्युरोलोजी उपचारका क्षेत्रमा भएका नयाँ नयाँ उपलब्धि र अस्पतालको क्षमताबारे जानकारी दिए । उनले स्ट्रोक, मिर्गी, पार्किन्सन रोग, न्युरोप्याथी, टाउकोमा चोटपटक, स्पाइनल डिसअर्डर र मस्तिष्क ट्युमरजस्ता जटिल न्युरो रोगहरूको अपोलो अस्पतालमा सफलताका साथ उपचार भइरहेको जानकारी दिए । उनले नेपालबाट थुप्रै बिरामी आफनो अस्पतालमा आउने गरेको जानकारी दिंदै यसरी नेपालबाट आउनेका लागि १० प्रतिशत छुटको व्यवस्था गरिएको पनि जानकारी दिए ।