हेल्थ टिभी अनलाइन : त्रिवि शिक्षण अस्पताल महाराजगंजमा १५ शैयाको इमर्जेन्सी ग्रीन एरिया सेवा थप गरिएको छ । स्वास्थ्य तथा जनसंख्या मन्त्री प्रदीप पौडेलले थपिएको १५ शैयाको इमर्जेन्सी ग्रीन एरिया वार्डको शुरुवात गरेका हुन् । यसका साथै मन्त्री पौडेलले अस्पतालमा शुरु गरिएको आधुनिक थ्री टेस्ला एमआरआई सेवा समेतको उद्घाटन गरे ।

अस्पतालमा थप सेवाको शुरुवात गर्दै मन्त्री पौडेलले त्रिवि शिक्षण अस्पतालमा आम नागरिकको भरोसा र विश्वास बढी भएका कारण बिरामीको भिड लाग्ने गरेको बताए । हाल अस्पतालमा थपिएको सेवाले आम नागरिकले ेकही भए पनि सहज रुपमा सेवा लिन सक्नेमा आफूले विश्वास लिएको बताए ।

अस्पतालका कार्यकारी निर्देशक प्राडा सुवास प्रसाद आचार्यले देशभरीबाट उपचारका लागि आउने बिरामीको स्वास्थ्य उपचारलाई अझ बढी प्रभावकारी बनाउन इमर्जेन्सी ग्रीन एरियामा १५ बेड थपिएको र यसले धेरै सहज हुने जनाए । उनले रेडियोलोजी विभागमा थपिएको थ्री टेस्ला अत्याधुनिक एमआरआई मेशिनले रोग पहिचानमा निकै सहयोग गर्ने र सो सेवाका लागि बाहिर जानपर्ने बाध्यता हटेको समेत जिकीर गरे ।