हेल्थ टिभी अनलाइन :  उपभोक्ता अदातलको फैसला विरुद्ध नेपाल चिकित्सक संघले आयोजना गरेको चरणवद्ध आन्दोलनका कारण आज पनि देशभरका ओपीडी सेवा ठप्प भएका छन् । केही साताअघि उपभोक्ता अदालतले उपचारमा लापरवाही भएको भन्दै ओम अस्पताल, हिमाल अस्पताल र ग्रान्डी सिटी अस्पताल र त्यहाँ उपचारमा कार्यरत चिकित्सकलाई बिरामीलाई क्षतिपूर्ति तिर्नुपर्ने फैसला गरेको थियो ।

त्यही फैसलाको विरुद्धमा चिकित्सक संघ आन्दोलनमा उत्रिएको हो । संघका अध्यक्ष डा अनिल विक्रम कार्की भन्छन, ‘चिकित्सकीय अभ्यासका क्रममा केही त्रुटी भए मेडिकल काउन्सिलले छानविन गरी दोषी देखिए अदालतले फैसला गर्न सक्ने प्रावधान छ । चिकित्सकीय अभ्यासलाई नियमन गर्ने स्पष्ट अधिकार मेडिकल काउन्सिललाई मात्र छ र हनुपर्छ ।’ उनी थप्छन, ‘यसरी उपचारमा त्रुटी देखाउँदै उपभोक्ता अदालतले सजायँ दिंदै जाने र क्षतिपूर्ति भराउने हो भने कुन चाहिं डाक्टरले गम्भीर प्रकृतिका बिरामी हेर्छन ? सबै पन्छिन नै खोज्छन् र अन्तत मार बिरामीलाई नै पर्न जान्छ ।’

उपभोक्ता संरक्षण ऐन २०७५ को दफा २ मा अन्य सेवा जस्तै स्वास्थ्य सेवालाई पनि एउटै क्याटागोरीमा राखिएकोमा उक्त व्यवस्था सच्याउन पनि उनले माग गरेका छन् । यही व्यवस्था कायम भए उपचारमा संलग्न हुन नसक्ने भन्दै सम्पूर्ण डाक्टरहरुले मेडिकल काउन्सिलबाट प्राप्त लाइसेन्स काउन्सिललाई नै बुझाउने भन्दै लाइसेन्स संकलन गर्ने कार्य पनि थालेका छन् ।

संघको नेतृत्वमा देशभरका डाक्टरहरु सोमबारदेखि ओपीडी सेवा ठप्प पारेर आन्दोलनमा उत्रिंदा बिरामी भने मारमा परेका छन् ।