हेल्थ टिभी अनलाइन : स्वास्थ्य तथा जनसंख्या मन्त्रालयले विपन्न नागरिकका लागि नि:शुल्क गर्ने भनेको पक्षघातको उपचारमा प्रयोग हुने औषधी सुरुमा तीन अस्पतालबाट उपलब्ध हुने जनाएको छ ।

बिहिबार मन्त्रालयमा औषधीकाबारेमा जानकारी दिन आयोजना गरिएको पत्रकार सम्मेलनमा मन्त्री प्रदिप पौडेलले अहिलेलाई वीर अस्पताल, त्रिवि शिक्षण अस्पताल र भरतपुर अस्पतालमार्फत यो औषधी उपलब्ध गराउन लागेको जानकारी दिए । मन्त्री पौडेलले समयमै उपचार पाए ज्यान जोगाउन सकिने भए पनि आर्थिक अभावमा कतिपय नागरिकको ज्यान गएकाले महँगो औषधी सहयोगमा प्राप्त गरेर उपलब्ध गराइन लागिएको बताए । उनले यसले आर्थिक अभाव भएका बिरामीलाई निकै राहत हुने समेत जिकीर गरे ।

कार्यक्रममा औषधी सहयोगमा ल्याउनका लागि सहजकर्ताको भूमिका निर्वाह गरेको संस्था वान हार्ट वल्र्डवाइडका निर्देशक सुर्य भट्टले स्वास्थ्य सेवा विभाग व्यवस्थापन महाशाखाका निर्देशक डा पवनजंग रायमाझीलाई औषधी हस्तान्तरण गरेका थिए । यो औषधी डाइरेक्ट रिलिफ अमेरिकाले सहयोग स्वरुप नेपाललाई दिएको हो । पहिलो चरणमा ८ सय भाइल उपलब्ध भएको र आवश्यकता अनुसार फेरि पनि औषधी आउने मन्त्री पौडेलले जानकारी दिए ।