४ फाल्गुन २०८१ , आइतवार

१२ दिनमा १३ लाख किशोरीले लगाइसके एचपीभी खोप

हेल्थ टिभी अनलाइन : पाठेघरको मुखको क्यान्सरबिरुद्धको एचपीभी खोप अभियानका क्रममा १२ दिनमा शनिबारसम्म १३ लाख किशोरीले खोप लगाइसकेका छन् ।

स्वास्थ्य तथा जनसंख्यामन्त्री प्रदिप पौडेलले उक्त जानकारी दिंदै यो अभियानलाई सफल पार्न खट्ने स्वास्थ्यकर्मी, अभिभावक, स्वयंसेवक, सहयोगी विद्यालय सबैलाई धन्यवाद दिएका छन् । उनले अभियान फागुन ६ गतेसम्म चल्ने भएकाले खोप लगाउन छुटेका कक्षा ६ देखि १० सम्म अध्ययनरत छात्रा र विद्यालय बाहिर रहेका भए १० देखि १४ वर्षका किशोरीहरुलाई नजिकैको स्वास्थ्य संस्थामा गएर अनिवार्य खोप लगाउन पनि आग्रह गरेका छन् ।

माघ २२ गते विश्व क्यान्सर दिवसका दिनदेखि सुरु भएको अभियान फागुन ६ गतेसम्म सञ्चालन हुनेछ । सरकारले देशभर झण्डै १७ लाख किशोरीलाई एचपीभी खोप दिने लक्ष्य लिएको छ ।

हेल्थ टिभी अनलाइन

हेल्थ टिभी अनलाइन स्वास्थ्य विधामा नेपाली पत्रकारिता इतिहासकै पहिलो श्रव्यदृश्य केन्द्रित मल्टी मिडिया अनलाइन पोर्टल हो। जनस्वास्थ्य समस्या, रोग र उपचार, चिकित्सा विज्ञान र शिक्षा, आयुर्वेद, स्वास्थ्य प्रविधि, प्राकृतिक चिकित्सा, जीवनशैलीलगायतका सवालमा समाचार, टिप्पणी, विचार, विज्ञको राय, अन्तरवार्ता, छलफल र संवादमार्फत विश्वव्यापी रूपमै पाठक, श्रोता र दर्शकलाई सचेत गराउने कार्यमा हेल्थ टिभी अनलाइन कटिबद्ध छ।