हेल्थ टिभी अनलाइन : भरतपुरमा तीन दिनसम्म सञ्चालन भएको नवौं नेपाल फर्मा एक्स्पो २०२४ आइतबार सम्पन्न भएको छ । एक्स्पो सफलतापूर्वक सम्पन्न भएकोमा आयोजकहरुले एक्स्पो सम्पन्न गर्न सहयोग गर्ने सबैलाई धन्यवाद ज्ञापन गरेका छन् ।

नेपाल औषधि उत्पादक संघ एपोन का अध्यक्ष मेहश प्रधानले नवौं संस्करणको एक्स्पो अत्यन्तै सफल भएको आफूहरुले महसुस गरेको बताए । प्रदर्शनीमा भाग लिन आउने प्रदर्शक र अवलोकनकर्ताहरु सन्तुष्ट भएको बताउँदै उनले भने, “एक्स्पोमा प्रदर्शनी गर्न र हेर्न आउने सबै सन्तुष्ट भएको हामीले पायौं ।”

उनले प्रदर्शनीका अवसरमा आयोजना गरिएका गोष्ठी, सेमिनार, अन्तक्र्रिया लगायतका कार्यक्रमहरु पनि निकै सफल भएको पाएका बताए । अध्यक्ष प्रधानले थपे “सबै खुशी हुँदा औषधि उत्पादक संघले राम्रो काम गरेको महसुस भएको छ ।” उहाँले एक्स्पो सफल बनाउने हर प्रकारले सहयोग गर्ने सबैलाई धन्यवाद व्यक्त गरे ।

एपोनका बरिष्ठ उपाध्यक्ष एवं एक्स्पोका संयोजक प्रभात रुङ्गटाले चितवनमा हामीसहित स्वदेशी तथा विदेशी पाहुनालाई राम्रो आतिथ्यता प्राप्त भएको बताउँदै धन्यवाद व्यक्त गरे ।

उनले उद्योग संघ चितवन, सम्पूर्ण पत्रकारहरु, जिल्ला प्रशासन कार्यालय, जिल्ला प्रहरी कार्यालय, भरतपुर महानगरपालिका लगायतका संघ संस्थाहरुलाई एक्स्पो सफल बनाउन सहयोग गरेकोमा धन्यवाद दिए ।

नेपाल फर्मा एक्स्पो अन्तर्राष्ट्रियस्तरको एक्स्पोको रुपमा स्थापित गर्न सफल भएको भन्दै संयोजक रुङ्गटाले अन्तर्राष्ट्रिय स्तरबाटै सफल कार्यक्रम आयोजना गरेको भन्दै बधाई पाएको बताए ।

सबैको साथ, सहयोग र हौसलाले एक्स्पो सफल भएको उनको भनाई छ । उनले भने “नेपाली औषधि उद्योगलाई अझै सवल र आत्मनिर्भर बनाउने प्रतिज्ञा गर्दछौं ।”

एपोनका उपाध्यक्ष एवं एक्स्पोका मिडिया संयोजक सन्तोष बरालले अन्तिम दिनमा पनि अवलोकन गर्न आउनेको घुईचो लागेको देखिएको बताए । एक्स्पो आयोजना गर्नुको मुख्य उद्देश्य आम जनसमुदायलाई नेपालमा गुणस्तरीय औषधि बन्छ भन्ने कुरा देखाउने, सिकाउने र बुझाउने नै भएको उनको भनाई छ ।

एक्स्पोले धेरै राम्रो सन्देश प्रवाह गरेको भन्दै उनले भने, “जसले औषधि लेख्न्, जसले औषधि बेच्छन् र जसले औषधिको काम गर्छन् उनीहरुका लागि नेपालमै गुणस्तरीय औषधि बनेको छ भन्ने सन्देश प्रवाह भएको छ । यो सर्वसाधारणसम्म पनि पुगेको छ ।”

यही फागुन २५ गतेबाट सञ्चालित भएका एक्स्पोमा स्वदेशी औषधि उद्योग सहित नौ वटा विदेशी कम्पनीहरुले प्रविधि, प्रयोगशाला लगायत औषधिजन्य उद्योगका लागि आवश्यक पर्ने सम्पूर्ण सामग्रीको प्रदर्शन गरिएको थियो