हेल्थ टिभी अनलाइन : वायु प्रदूषणको स्तर बढ्दै गएपछि भारतको राजधानी नयाँ दिल्लीमा प्राथमिक विद्यालय केही समयका लागि बन्द गरिएको छ ।

प्रदूषणबाट बालबालिकाहरु प्रभावित हुने भएपछि आइतबारदेखि १० नोभेम्बरसम्म दिल्लीका सबै प्राथमिक विद्यालयहरु बन्द गरिएको हो। यसैगरी कक्षा ६ देखि १२ कक्षासम्मको पढाइ अनलाइन माध्यमबाट हुने पनि बताइएको छ ।

भारतीय मिडियाहरुका अनुसार दिल्लीको वायु प्रदूषण अति गम्भीर स्तरमा पुगेको छ । दिल्लीमा समग्र वायु गुणस्तर सूचकांक एक्युआई आइतबार ४८२ मा रेकर्ड गरिएको थियो । जुन गम्भीर श्रेणी हो । ५ नोभेम्बर आइतबार बिहान ७ बजेको रेकर्ड अनुसार दिल्लीका वजिपुर, शादीपुर, द्वारका, पन्जाबी बाग, मुंडका, लोधी रोड, ओखला लगायतका क्षेत्रमा वायु प्रदूषणको स्तर उच्च श्रेणीमा पुगेको छ ।

दिल्लीमा यो बेला हरेक वर्ष प्रदूषण उच्च स्तरमा पुग्ने गरेको छ । जसले गर्दा विभिन्न स्वास्थ्य समस्या देखिने गरेको छ । दिल्ली विश्वमै उच्च वायु प्रदूषित शहरमध्ये पर्छ ।