हेल्थ टिभी अनलाइन \काठमाडौं : देशभर डेगुं संक्रमितको संख्या तीब्र रुपमा बढ्दो छ । इपिडिमियोलोजी तथा रोग नियन्त्रण महाशाखाका अनुसार अहिले देशभर १३ हजार २९२ जनामा डेंगु संक्रमण पुष्टि भएको छ । यसैगरी ७४ जिल्लामा डेंगु संक्रमण देखिएको पनि महाशाखाले जनाएको छ ।

हालसम्म १० जनाको डेंगु संक्रमणबाट मृत्यु भइसकेको छ । कुल संक्रमितमध्ये ७ हजारभन्दा बढी सुनसरीमा मात्रै रहेको महाशाखाले जनाएको छ ।

महाशाखाका निर्देशक डा रुद्र मरासिनीले वर्षाको समय भएकाले यो बेला जताततै पानी जम्ने भएकाले लामखु्ट्टेको संख्यामा वृद्धि भई डेंगु संक्रमण पनि बढ्ने बताए । उनले यो बेला अझ बढी सतर्कता अपनाउनपर्नेमा जोड दिए ।

महाशाखाले डेंगु संक्रमणबाट बच्नका लागि सधैं पूरा बाहुला भएको लुगा लगाउन, घरको झ्याल ढोकामा जाली लगाउन, घर वरपर पानी जम्न नदिन आग्रह गरेको छ ।