हेल्थ टिभी अनलाइन \काठमाडौं : नेपालमा पहिलोपटक अनुहारका विकृतिसम्बन्धी समस्याको उपचारको लागि विशिष्टीकृत अस्पताल बन्ने भएको छ । नेपाली बिरामीहरुलाई नि:शुल्क उपचार गर्ने उद्धेस्यका लाथि उक्त अस्पताल बन्न लागेको क्रेनियोफेसियल सर्जन तथा अस्पतालका सञ्चालक डा सुमित सिंहले जानकारी दिए ।

डा सिंहका अनुसार उक्त अस्पतालमा क्लेफ्ट चिल्ड्रेन इन्टरनेशनलको आर्थिक सहयोगमा बिरामीको नि:शुल्क उपचार गरिनेछ । विश्वप्रख्यात क्रेनियोफेसियल प्राडा हर्मन सेलरद्धारा स्थापित क्लेफ्ट चिल्ड्रेन इन्टरनेशनलको वैदेशिक अंशका रुपमा नेपालमा पनि पहिलोपटक नेशनल इन्स्टिच्युट अफ क्रेनियोफेसियल सर्जरी निक्स -द फेस हस्पिटलको स्थापना गरिएको हो ।

यो अस्पताल नेपालमा स्थापना गरेर उपचारको पहुँचबाहिर रहेका अनुहारको विकृतिको समस्या भएका धेरै बिरामीको निशुल्क उपचार गर्ने १२ वर्षअघिदेखिको आफनो चाहना अब बल्ल पूरा हुने भएको डा सिंहले जनाए । उनले आर्थिक अभावका कारण उपचार गर्न नसक्नेका लागि यो अस्पताल र सेवा धेरै महत्वपूर्ण रहेको समेत जिकीर गरे । यो उपचार सेवा सम्पूर्ण मात्रामा नि:शुल्क हुने र यसमा उपचार भरी बिरामी मात्र नभएर एक जना कुरुवाको खान बस्नको समेत व्यवस्था गरिने जनाइएको छ ।

अहिलेलाई उक्त सेवा कान्तिपुर डेन्टल अस्पतालबाट सुरु हुनेछ भने नख्खुमा डेढ वर्षभित्र अस्पताल भवन बनाइसकेर सेवा सुरु गरिनेछ । यस संस्थाले सुरुको वर्ष ५ सय जना र त्यसपछि प्रत्येक वर्ष १५ सय बिरामीको निशुल्क शल्यक्रिया गर्ने लक्ष्य लिएको छ । यद्यपी बिरामी धेरै आएमा सबैको उपचार निशुल्क गर्न सकिने समेत डा सिंहले जानकारी दिए ।

डा सिंहले भने, ‘नेपालमा खुँडोपनको उपचार केही संस्थामा हुने गरे पनि यसको विभिन्न पाटासँग जोडिएको समस्याको भने सम्पूर्ण उपचार निशुल्क हुन सकेको थिएन । अब भने यो सेन्टरको सेवा सुरु भएसँगै खुँडोपन वा अनुहारमा भएको जस्तोसुकै विकृतिको सस्तोदेखि महंगोसम्म उपचार निशुल्क हुनेछ । त्यसैले हामी अरुभन्दा अलि फरक छौं र विशिष्टीकृत छौं ।’

नेपालमा हरेक ८ सय जनामध्ये एक जनामा खुँडोपन वा अनुहारको विकृतिको समस्या देखिने गरेको तथ्यांक छ ।