हेल्थ टिभी अनलाइन \काठमाडौं : ललितपुरको हरिसिद्धिमा रहेको नेपाल क्यान्सर हस्पिटल तथा रिसर्च सेन्टरले आफनो छैठौं वार्षिकोत्सव मनाएको छ । क्यान्सर उपचारको क्षेत्रमा आफनो छुट्टै पहिचान बनाउन सफल र धेरै बिरामीको विश्वास जिल्न सफल यस अस्पतालले आज एक कार्यक्रमको आयोजना गरी वार्षिकोत्सव मनाएको हो ।

वार्षिकोत्सव कार्यक्रममा बोल्दै अस्पतालका कार्यकारी अध्यक्ष एवम वरिष्ठ क्यान्सर रोग विशेषज्ञ डा सुदिप श्रेष्ठले अस्पताललाई यहाँसम्म ल्याइ पुराउन धेरै जनाको सहयोग र साथ रहेको जिकीर गरे । उनले बिरामीले अस्पतालप्रति देखाएको विश्वास र आशाले यहाँसम्म पुग्न सकिएको जिकीर गरे । डा श्रेष्ठले सुरुमा अस्पताल संचालन गर्दा निकै गाह्रो भएको स्मरण गर्दै आहिले छोटो समयमै अस्पतालमा उच्चस्तरीय सेवा दिंदै अस्पताललाई नाफामा लान सकिएको बताए । उनले सबैको सामुहिक प्रयास, साथ र सहयोग तथा बिरामीहरुको विश्वास र मायाकै कारणले अस्पताल आजको अवस्थामा आउन सफल भएको बताए।

यसैगरी कार्यक्रममा अस्पतालका प्रमुख सल्लाहकार पूर्व प्रधानसेनापति रुक्मागंत कटुवालले नेपाल क्यानसर अस्पतालले नेपालीको क्यान्सर उपचार नेपालमै सम्भव छ भन्ने नारालाई पूरा गरेको बताए । उनले क्यान्सर उपचारका लागि विदेश वा अरु कुनै पनि ठाउँ जान नपर्ने गरी सेवा दिएकोमा अस्पताल परिवारलाई धन्यवाद समेत दिए ।

कार्यक्रममा अस्पतालका मेडिकल निर्देशक डा विजेशराज घिमिरेले अस्पतालको विकास र विस्तारमा अस्पतालका सम्पूर्ण कर्मचारीको मिहिनेत र लगन महत्वपूर्ण रहेको बताए । उनले अस्पतालले यही गतिमा सेवा विस्तार र अझ परिस्कृत गर्दै लाने समेत जनाए ।

कार्यक्रममा अस्पतालमा ८ वर्षदेखि कार्यरत कर्मचारीलाई सम्मान गरिएको थियो भने आशा नामक स्मारिकाको विमोचन समेत गरिएको थियो ।