हेल्थ टिभी अनलाइन \काठमाडौं : झण्डै शुन्यमा झरेको कोरोना संक्रमण देशमा फेरि एकपटक बढ्न थालेको छ ।

गत २४ घण्टामा एक जना कोरोना संक्रमितको मृत्यु भएको छ भने १०६ जना संक्रमित थपिएका छन्। नेपालमा फेरि कोरोना संक्रमण बढेको भन्दै स्वास्थ्य तथा जनसंख्या मन्त्रालयले कोरोना विरुद्धको खोप नलगाएकालाई खोप लगाउन र बुस्टर खोप नलगाएकालाई बुस्टर खोप लगाउन आग्रह गर्दै आएको छ । यसैगरी मन्त्रालयले सबैलाई जनस्वास्थ्यका मापदण्ड पालना गर्न समेत आग्रह गरेको छ ।

आज थपिएका नयाँ संक्रमितसहित देशभर सक्रिय कोरोना संक्रमितको संख्या ४६९ पुगेको छ । अहिले १३ जना संक्रमितको आइसीयूमा र ५ जनाको भेन्टिलेटरमा उपचार भइरहेको छ ।

नेपालमा हालसम्म कोरोना संक्रमणबाट १२ हजार २१ जनाको मृत्यु भएको छ ।

देशभर कोरोना संक्रमण बढे पनि सर्वसाधारण कसैले जनस्वास्थ्यका मापदण्ड पालना गरेको देखिंदैन्। अरु त अरु जनस्वास्थ्यका मापदण्ड पालना गर भनेर विज्ञप्ति निकाल्ने स्वास्थ्य मन्त्रालयकै कर्मचारी एवम स्वास्थ्यकर्मीले समेत मास्क लगाउने, दूरी कायम गर्ने जस्ता मापदण्ड पालना गरेको देखिंदैन।