हेल्थ टिभी अनलाइन \काठमाडौं : काठमाडौंको मिनभवनमा रहेको निजामती कर्मचारी अस्पतालका कर्मचारीहरुले कार्यकारी निर्देशकको राजिनामा माग गर्दै आन्दोलनमा उत्रिएका छन्।

अस्पतालले केहिदिन अघि बिभिन्न पदका लागि ३ सय ५० भन्दा बढी संख्यामा कर्मचारी माग गरेपछि अस्पताल ब्यवस्थापन पक्ष र कार्यरत कर्मचारीहरु वीच विवाद उत्पन्न भएको हो । असन्तुष्ट चिकित्सक, स्वास्थ्यकर्मी तथा कर्मचारीहरुले अस्पतालका कार्यकारी निर्देशक डा विधाननीधि पौडेलको राजिनामा मागेका हुन् ।

अस्पताल ब्यवस्थापनले एकलौटी ढंगबाट कर्मचारी भर्ना गर्न खोजेको कर्मचारीहरुको आरोप छ । बर्षौदेखि कार्यरत कर्मचारीको हित र मर्म विपरित ब्यवस्थापन एकलौटी लागेको भन्दै उनीहरुले आन्दोलन घोषणा गरेका छन् ।शुक्रबारदेखि हरेक दिन १५ मिनेट धर्ना दिने कार्यक्रम राखेका छन् जुन आज चौंथो दिन पनि जारी छ ।

निजामती कर्मचारी अस्पतालमा क्रियाशिल आधिकारिक ट्रेडयूनियको अगुवाइमा आन्दोलन सुरु भएको हो । आन्दोलनले प्रशासनिक कामलाई मात्र प्रभावित बनाउने तर अस्पतालको नियमित सेवा भने खुला नै रहेको आधिकारिक ट्रेडयुनियनका सचिव विनोद पोखरेल जानकारी दिएका छन् ।

यसैगरी डाक्टर एशोसिएसन अफ सिभिल सर्भिस हस्पिटलका अध्यक्ष डा सुमन मरहठ्ठाले अस्पतालले वर्षौदेखि काम गरिरहेका स्वास्थ्यकर्मी तथा कर्मचारीलाई व्यवास्ता गर्दै बाहिरबाट कर्मचारी भर्ना गर्न खोज्नु खेदजनक भएको र यसमा सबै कार्यरत कर्मचारीको आपत्ति रहेको बताए । उनले गैर जिम्मेवारपूर्वक वर्षौदेखि काम गरिरहेका कर्मचारीलाई निकाल्नका लागि बाहिरबाट कर्मचारी माग गर्नु गलत कदम भएको र त्यसभन्दा पहिले अस्पतालमा अहिले कार्यरत स्वास्थ्यकर्मी तथा कर्मचारीको उचित व्यवस्थापन गरिनुपर्ने बताए ।

उनले अस्पताल प्रशासनको गलत कदम विरुद्ध आन्दोलनमा उत्रिए पनि बिरामीको सेवा भने नरोकिने जनाए ।