अस्पतालमा विशेषज्ञ पुग्दा…

अस्पतालमा विशेषज्ञ पुग्दा…

कुनै समय एक चिकित्सकको भरमा चलेको बागलुङस्थित धौलागिरि अञ्चल अस्पतालले अहिले विशेषज्ञसहितको सेवा उपलब्ध गराउन थालेपछि नागरिक खुशी भएका छन्। साविक धौलागिरि अञ्चलकै एकमात्र सुविधासम्पन्न अस्पतालमा लामो समयपछि विशेषज्ञ चिकित्सक आएकाले जिल्लावासी खुशी भएका हुन्।

विशेषज्ञसहितका सात चिकित्सक भएकाले हाल अस्पतालमा बिरामीको सङ्ख्या पनि वृद्धि भएको छ । लामो समयदेखि ‘रेफर सेन्टर’का रूपमा चिनिएको उक्त अस्पतालमा सबैभन्दा बढी स्त्रीरोग विशेषज्ञको माग थियो। भौतिक पूर्वाधारको व्यवस्थापनका साथै विशेषज्ञ चिकित्सकका कारण उपचारमा सहज भएको डा. सागरकुमार राजभण्डारीले बताए।

‘अस्पतालमा दरबन्दीअनुसारका विशेषज्ञ चिकित्सक ल्याउन सबैको पहलले सम्भव भएको छ’, व्यवस्थापन समितिका सदस्य शालिग्राम शर्माले भने, ‘दुई दिनमै हाजिर भएर काजमा फकर्ने परिपाटी अन्त्य गर्दैछौँ।’

२०६७ मा बागलुङ जिल्ला अस्पताललाई स्तरोन्नति गरी अञ्चल अस्पताल बनाइए पनि सेवा तथा सुविधा गुणस्तरीय हुन सकेकाे थिएन। १६ विशेषज्ञसहित २३ चिकित्सकको दरबन्दी भएको उक्त अस्पतालमा हाल सात विशेषज्ञ र १५ मेडिकल अधिकृतले सेवा प्रदान गरिरहेको अस्पतालका सूचना अधिकारी तीर्थ गौतमले बताए।