रूपन्देही : सैनामैना नगरपालिका–३ का ३५ महिला पाठेघरसम्बन्धी समस्या देखिएको छ।

स्वास्थ्य परीक्षणका क्रममा ती महिलामा पाठेघरसम्बन्धी समस्या देखिएको पर्रोहा हेल्थ पोष्ट, मुर्गियाले जनाएको छ। ३३ जनाको पाठेघरमा क्यान्सरको जोखिम रहेको, १० जनाको पाठेघरमा मासु पलाएको र एकको पाठेघर खसेको पाइएकाले उनीहरूलाई थप उपचारका लागि सिफारिस गरिएको परिवार नियोजन सङ्घ, बुटवलकी नर्स विष्णु गुरुङले जानकारी दिइन्। उनीहरू २० देखि ५० वर्ष उमेर समूहका छन्।

सैनामैना नगरपालिका–३ को आयोजनामा पर्रोहा हेल्थ पोष्टमा सञ्चालन गरिएको तीन दिने निःशुल्क महिला स्वास्थ्य शिविरमा ४११ महिलाले स्वास्थ्य परीक्षण गराएको वडाध्यक्ष रत्नबहादुर पौडेलले जानकारी दिए। परीक्षण गराएकामध्ये २६६ महिलालाई औषधी वितरण गरिएको बताइएको छ।