चितवनः सामाजिक अभियानसहित चितवन उद्योग संघको चितवन प्रदर्शनी केन्द्रमा जारी ‘नेपाल फर्मा तथा हेल्थ एक्स्पो २०१९’ आइतवार सम्पन्न भएको छ ।

तीनदिने एक्स्पोको २५ हजारभन्दा बढीले अवलोकन गरेको आयोजक नेपाल औषधि उत्पादक संघले बताएको छ । आइतवार अन्तिम दिन भएकाले पनि एक्स्पोमा अवलोकनकर्ताको उल्लेख्य सहभागिता रहेको एक्स्पोका मिडिया संयोजक विप्लब अधिकारीले जानकारी दिए ।औषधि उत्पादन र प्रविधिका क्षेत्रमा भएका विकास, उपलब्धि र नयाँ नयाँ प्रविधिबारे जानकारी दिन पहिलोपटक काठमाडौं बाहिर आयोजित एक्स्पो पूर्णरूपले सफल भएको पनि उनले दाबी गरे ।

सातौं संस्करणको एक्स्पोमा स्वदेशी र विदेशीका गरी दुई सय स्टल रहेका थिए । एक्स्पोमा विभिन्न ३० बहुराष्ट्रिय कम्पनी, १ सय २० भारतीय, १० चिनियाँ कम्पनीको सहभागिता रहेको थियो। प्रत्येक २ वर्षमा आयोजना हुँदै आएको एक्स्पो पहिलोपटक राजधानी बाहिर आयोजना गरिएको हो ।

एक्स्पोको उद्घाटन उद्योग वाणिज्य तथा आपूर्ति मन्त्री मातृका प्रसाद यादवले गरेका थिए ।  एक्स्पोको अर्को महत्वपूर्ण मरणोपरान्त अंगदान सामाजिक अभियानको शुभारम्भ भने उप्रधान तथा स्वास्थ्य मन्त्री उपेन्द्र यादवले गरेका थिए ।

स्वदेशमै उत्पादन भइरहेका र आत्मनिर्भर भइसकेका औषधि सरकारले आयातमा रोक लगाउनुपर्नेमा संघका अध्यक्ष दीपकप्रसाद दाहालले जोड दिएका थिए ।
एक्स्पो विशेषत सम्बन्धित विधाका चिकित्सक, फर्मासिष्ट, स्वास्थ्यकर्मी, उद्यमी, सम्बन्धित विधामा अध्ययनरत विद्यार्थीले अवलोकन गरेका थिए ।

९ सय बढीले भरे मरणोपरान्त अंगदान गर्ने फारम

नेपाल औषधि उत्पादक संघले सातौं नेपाल फर्मा तथा हेल्थ एक्स्पो मार्फत सामाजिक अभियानमा हात अघि बढाएको छ । मरणोपरान्त अंगदान अभियानको शुभारम्भ उपप्रधान तथा स्वास्थ्य मन्त्री उपेन्द्र यादवले गरेका थिए । जिउँदोमा रत्तदान,मरेपछि अंगदान भन्ने नाराका साथ शुरु गरिएको अभियानमा ९ सय बढीले साथ दिएका छन्। एक्स्पोमा १ हजार जनालाई मरणोपरान्त अंगदान गर्ने फारम भराउने लक्ष्य आयोजकको थियो। संघका अध्यक्ष दीपकप्रसाद दाहाल आफैले अंगदान गर्ने फारम भरेर सामाजिक अभियानको शुरुवात गरेका थिए ।