काभ्रे : नमोबुद्ध नगरपालिका–४ वडा कार्यालयले आफ्ना वडाका गर्भवतीलाई सुत्केरी हुन अस्पताल जाने यातायात खर्च दिने भएको छ।

गर्भवती महिलालाई अस्पतालमा गई सुरक्षित सुत्केरी हुन प्रेरित गर्ने उद्देश्यले यातायात खर्च दिने निर्णय गरिएको वडाध्यक्ष उद्धवप्रसाद काफ्लेले बताए। ‘गर्भवती महिलाले अस्पतालमा शिशुलाई जन्म दिँदा आमा र बच्चा दुवैको जोखिम न्यून हुन्छ, त्यसैले अब सुरक्षित सुत्केरी हुन अस्पताल जाने यातायात खर्च दिन्छौँ’, उनले भने।

वडाले गर्भवती महिलाले चाहेको जुनसुकै अस्पताल जाँदाको एम्बुलेन्स वा एम्बुलेन्ससरहको भाडा दिने निर्णय गरेको हो। यसका लागि वडाले हाल  एक लाख ५० हजार रूपैयाँको कोष बनाएको छ।

नगरपालिका स्वास्थ्य समितिका संयोजक रहेका वडाध्यक्ष काफ्लेले आउँदो आर्थिक वर्ष नगरका अन्य सबै वडामा सुरक्षित सुत्केरी कोष निर्माण गरी सुत्केरी महिलालाई यातायात खर्च दिने योजना बनाएको बताए।