काठमाडाैं : कर्मचारी समायाेजनकाे विराेधमा रहेका सरकारी चिकित्सकहरूले आफूहरूको माग सुनुवाइ गर्न सरकारलाई ७२ घण्टाको ‘अल्टिमेटम’ दिएका छन्।

आइतबारदेखि ७२ घण्टामा पनि आफ्ना माग सुनुवाइ नभए बुधबारदेखि अस्पतालहरूमा अनिश्चितकालीन  सेवा बहिष्कार(आकस्मिक बाहेक) गर्ने सरकारी चिकित्सक संघ नेपाल (गोदान) ले विज्ञप्ति निकाली जानकारी दिएकाे छ।

शनिबार बसेको संघको बैठकले गरेको निर्णयअनुसार हरेक दिन बिहान १० देखि ११ बजेसम्म आफूहरू कार्यरत अस्पतालहरूमा विरोध तथा धर्ना कार्यक्रम गर्ने बताएकाे छ।

यस्तै सरकारले यही फागुन १५ गते बुधबार मनाउन लागेको स्वास्थ्य सेवा दिवस बहिष्कार गर्ने र यसअघि संकलन गरिएको सरकारी चिकित्सकको सामूहिक राजीनामा पनि सरकारलाई बुझाउने अध्रयक्ष डा. दीपेन्द्र पाण्डे र महासचिव रविन खड्काद्वारा हस्ताक्षरित विज्ञप्तिमा उल्लेख छ।

‘राज्यपक्षले समस्या समाधान नगरे सम्पूर्ण सरकारी चिकित्सकको संकलित सामूहिक राजीनामा बुझाई राज्यपक्षलाई मार्गप्रशस्त गरिदिने’, संघद्वारा प्रकाशित विज्ञप्तिमा भनिएकाे छ।