काठमाडौं : औषधि व्यवस्था विभाग (डीडीए) का महानिर्देशक नारायणप्रसाद ढकालसँग स्वास्थ्य मन्त्रालयले स्पष्टीकरण मागेको छ। ढकालले नियम मिचेर राष्ट्रिय औषधि प्रयोगशालामा निमित्त प्रमुख नियुक्त गरेको विषयमा मन्त्रालयले स्पष्टीकरण मागेको हो ।

शुक्रबार मन्त्रालयले पत्र पठाउँदै महानिदेशक ढकालसँग स्पष्टीकरण मागेको स्वास्थ्य तथा जनसंख्या मन्त्रीका प्रेस संयोजक महेश चौरासियाले जानकारी दिए।

ढकालले गत पुस ३० गते सिनियर डिभिजनल केमिष्ट शैलेशकुमार झालाई राष्ट्रिय औषधि प्रयोगशाला बबरमहलमा निमित्त प्रमुख नियुक्ति दिएका थिए। निमित्त प्रमुख झालाई प्रयोगशालाको आर्थिक र प्रशासनिक अधिकारसमेत दिइएको छ। सामान्यतया निमित्तको जिम्मेवारीमा भएकालाई सामान्यतया आर्थिक अधिकार दिइँदैन ।

११ औँ तहका कर्मचारी महानिर्देशक ढकालले ११औँ तहकै निमित्त प्रमुखमा झालाई नियुक्त गरेका हुन्। समान तहको कर्मचारीले समान तहमै नियुक्त गर्न मिल्दैन। त्यसैले ढकालले पदको दुरुपयोग गरेको आरोप लागेको छ।

व्यवस्थापन महाशाखाले वरिष्ठताका आधारमा निमित्त प्रमुख तोक्न मन्त्रालयसमक्ष सिफारिस गर्ने भने पनि त्यसाे नगरी ढकाल आफैँले निमित्त प्रमुख नियुक्त गरेका हुन्।