म्याग्दी : धौलागिरी गाउँपालिकाका साढे तीन हजार विद्यार्थीको स्वास्थ्य परीक्षण गरिएको छ। २८ विद्यालयका तीन हजार ७२२ जनामध्ये तीन हजार ४४६ जनाको स्वास्थ्य परीक्षण गरिएको गाउँपालिकाका उपप्रमुख रेशम छन्त्यालले जानकारी दिए।

गाउँपालिकाको स्वास्थ्य शाखा र गुड नेवर्स इन्टरनेसनल नेपालको साझेदारीमा कदम म्याग्दीद्वारा सञ्चालित सामुदायिक विकास परियोजनासँगको सहकार्यमा स्वास्थ्य परीक्षण गरिएको हो। विद्यार्थीहरूको स्वास्थ्य समस्या पहिचान, थप उपचारको व्यवस्था र स्वास्थ्य तथा सरसफाइप्रति सचेत बनाउने उद्देश्यले स्वाथ्य परीक्षण गरिएकाे उपाध्यक्ष छन्त्यालले बताए। स्वास्थ्य परीक्षणका क्रममा विद्यार्थीहरूमा दाँत र आँखाको समस्या बढी पाइएको छ।

गाउँपालिकाको गुर्जा, लुलाङ, मुना, मुदी र मराङका १९ वटा सामुदायिक विद्यालयमा सामुदायिक विकास परियोजना लागू भएको छ। वर्षको दुई पटक विद्यार्थीको स्वास्थ्य परीक्षण गर्ने गाउँपालिकाको नीति तथा कार्यक्रममा समेत छ।