काठमाडौं : स्वास्थ्यमा सुधार आएपछि पूर्वयुवराज पारस शाह अस्पतालबाट डिस्चार्ज हुँदैछन्।

गम्भीर प्रकारको हृदयाघात भएपछि सोमबार अपराह्न पारसलाई नर्भिक अस्पताल पुर्‍याइएको थियो। उनको मुटुको कोरोनरी एञ्जियोप्लास्टी गरिनुका साथै स्टेन्ट राखिएको छ।

उनी सामान्य हिँडडुल गर्न सक्ने तथा बोलीचाली गर्न सक्ने अवस्थामा छन्। अहिले उनलाई सीसीयूबाट अस्पतालको निजी क्याबिनमा सारिएको छ। शुक्रबार अपराह्नसम्ममा उनी डिस्चार्ज हुने अस्पतालले जनाएकाे छ।

खानपान तथा जीवनशैलीमा सुधार गर्नुका साथै नियमित औषधि सेवन गरे उनको स्वास्थ्यमा थप सुधार आउने चिकित्सकहरूले बताएका छन्।

पारसलाई २०६३ सालमा पहिलोपटक हृदयाघात भएको थियो। त्यसपछि ०७२ सालमा दोस्राे पटक हृदयाघात भएको हो । उनलाई पटकपटक हृदयाघात हुनुमा वंशाणुगत  कारण तथा गलत खानपान  नै प्रमुख भएको उपचारमा संलग्न चिकित्सक बताउँछन्।