फिदिम : पाँचथर जिल्ला अस्पतालमा सुत्केरी गराएका महिलाले यातायात खर्चबापतको रकम पाउन छाडेको दुई महिना बित्यो। प्रदेश सरकारले पर्याप्त बजेट निकासा नगर्दा अस्पतालमा सुत्केरी हुने आमाले विगत दुई महिनादेखि यातायात खर्चबापतको रकम नपाएका हुन्।

नेपाल सरकारले आमा सुरक्षा कार्यक्रमअन्तर्गत सुत्केरीलाई एक हजार ४०० यातायात खर्च दिन्थ्यो। चालू आर्थिक वर्षको नीति, कार्यक्रम तथा बजेटमार्फत सरकारले उक्त यातायात खर्च दोब्बर पारिएको घोषणा गर्यो। सोहीअनुसार स्वास्थ्य संस्थामा परिपत्रसमेत जारी गर्यो तर, घोषित नीतिअनुसार बजेट निकासा नहुँदा पाँचथर जिल्ला अस्पतालमा सुत्केरी गराउन आउने महिलाले गत मङ्सिरदेखि यातायात खर्चबापतको रकम प्राप्त गर्न नसकेको पाँचथर जिल्ला अस्पतालका प्रमुख, मेडिकल सुपरिटेण्डेण्ट डा. बुद्धिबहादुर थापाले जानकारी दिए।

माथिल्ला निकायको परिपत्रअनुसार अस्पतालले गत साउनदेखि अस्पतालमा सुत्केरी गराउन आउने महिलालाई दुई हजार ८०० रूपैयाँ यातायात खर्च दिन थालेको थियो।  पछि निकासा हुने विश्वासमा अस्पताल विकास समितिको बजेटबाट समेत सुत्केरीलाई यातायात खर्च वितरण गरिएको थियो।

अस्पतालले चालू आर्थिक वर्षको साउन, भदौ, असोज र कात्तिक महिनामा सुत्केरी गराएबापत महिलालाई दुई हजार ८०० का दरले रकम वितरण गरेको थापाले बताए। प्रदेशबाट विनियोजित बजेट सकिएपछि मङ्सिरदेखि सुत्केरी आमालाई यातायात खर्च प्रदान गर्न नसकिएको उनकाे भनाइ छ।