लमही : प्रत्येक सरकारी अस्पतालमा एम्बुलेन्स हुनुपर्ने भएपनि अहिले दाङको राप्ती अञ्चल अस्पताल एम्बुलेन्सविहीन अवस्थामा छ। अस्पताल स्थापनादेखि सञ्चालन हुँदै आएका एम्बुलेन्स तीन वर्षदेखि बिग्रिएर थन्किएको छ।

एम्बुलेन्स नभएपछि बिरामीलाई अन्य अस्पतालमा पठाउँदा तथा टाढाबाट बिरामी ल्याउन निजी एम्बुलेन्स प्रयोग गर्नुपर्ने बाध्यता छ। अस्पतालको एम्बुलेन्स बिग्रिएपछि अहिले निजी एम्बुलेन्समा सिफारिस गर्ने गरेको अस्पतालका सूचना अधिकारी कमल सुवेदीले जानकारी दिए।

निजी एम्बुलेन्सले महंगो शुल्क तिर्नुपर्ने सेवाग्राहीको बाध्यता छ। अर्कोतर्फ आफूलाई आवश्यक परेको समयमा एम्बुलेन्स पाउन पनि समस्या हुने गरेको सेवाग्राही दधिराम केसीले बताए। एम्बुलेन्स चलाउनका लागि एकजना चालकको दरबन्दी रहे पनि अहिले रिक्त छ।

त्यस्तै घोराहीको हाल स्वास्थ्य विज्ञान प्रतिष्ठान (साविकको राप्ती उपक्षेत्रीय अस्पताल) मा १० वर्षदेखि बिग्रिएको एम्बुलेन्स मर्मत हुनसकेको छैन। पटकपटक बिग्रिने र मर्मत गर्दा धेरै खर्च हुने भएकाले मर्मत नगरी त्यतिकै थन्काइएकाे छ।

दाङका सातवटा एम्बुलेन्स प्रयोगविहीन अवस्थामा छन्। दाङमा सञ्चालनमा आएका ६२ मध्ये अहिले ५५ वटा एम्बुलेन्समात्रै सञ्चालनमा छन्। राप्ती अञ्चल अस्पताल, राप्ती स्वास्थ्य विज्ञान प्रतिष्ठान, लाइन्स क्लब आफ तुलसीपुर, घोराही उद्योग वाणिज्य सङ्घ र होटल व्यवसाय समिति घोराहीलगायतका सातवटा एम्बुलेन्स बिग्रिएर प्रयोगविहीन अवस्थामा रहेको संयुक्त एम्बुलेन्स चालक संघ दाङका अध्यक्ष इन्द्रबहादुर केसीले जानकारी दिए।