बेझाड : पूर्वखोला गाउँपालिका पाल्पाले चार वटा स्वास्थ्य चौकीलाई सुत्केरी गराउँदा आवश्यक पर्ने सामग्री तथा उपकरण प्रदान गरेको छ।

गाउँपालिकाले वडा नम्बर १ को सिलुवा, २ को जल्पा, ५ वीरकोट र ६ हेक्लाङको स्वास्थ्य चौकीलाई सक्सन मेसिन, इलेक्ट्रिक अक्सिजन मेसिन, डब्लरलगायतका औजार तथा उपकरण उपलब्ध गराएको गाउँपालिकाका स्वास्थ्य उपसंयोजक मोहन ढकालले जानकारी दिए।

बाँकी रहेका वडा नम्बर ३ को रिङनेरह र ४ को देवीनगर स्वास्थ्य चौकीलाई पनि छिट्टै नै सुत्केरी गराउन आवश्यक पर्ने सामग्री र उपकरण उपलब्ध गराउने बताइएको छ। प्रतिसेट एक लाख २० हजार रुपैयाँभन्दा बढी मूल्यका ती उपकरण गाउँपालिकाले आफ्नै खर्चमा खरीद गरी स्वास्थ्य चौकीलाई प्रदान गरेको ढकालले जानकारी दिए।

गाउँपालिकाले संस्थागत सुत्केरी अभियानलाई थप मद्दत गर्न सामग्री र उपकरण उपलब्ध गराएको बताइएको छ। ‘जिरो होम डेलिभरी’ अभियानलाई शतप्रतिशतमा पुर्याउने लक्ष्यका साथ गाउँपालिकाले काम गरिरहेको छ। गाउँपालिकाले शुरु गरेको संस्थागत सुत्केरी कार्यक्रम अहिले निकै प्रभावकारी बन्दै गएको छ।