रामपुर  पाल्पाको एक  विद्यालयमा ‘जङ्क फुड’ ल्याउन र जन्मदिनका अवसरमा चक्लेट बाँड्न निषेध गरिएको छ। रामपुर १० रामटारस्थित जनकल्याण माध्यमिक विद्यालयमा ‘जङ्क फुड’ ल्याउन र जन्मदिनमा चकलेट दिन निषेध गरिएको हो।

विद्यालयको वातावरणीय र पर्यावरणीय सुधार तथा स्वास्थ्य शिक्षासम्बन्धी चेतना जगाउन यस्तो गरिएको प्रधानाध्यापक आनन्दप्रसाद भण्डारीले बताए। विद्यालयमा ‘इको क्लब’ गठन गरेर घरमै तयार पारेका खाजा विद्यार्थीलाई प्रयोग गराउन तथा पत्रु खानाको प्रयोग रोक्ने निर्णय भएको छ।

बजारमा पाइने विभिन्न खानेकुराले विद्यार्थीको स्वास्थ्यमा असर गर्ने र पढाइमा समेत प्रभाव पार्ने भएपछि अब जन्मदिनको अवसरमा चकलेट वितरण नगरी शुभकामना आदानप्रदान मात्र गरिने शिक्षक दामोदर तिमिल्सिनाले जानकारी दिए।

पत्रु खाना बोकेर आउने र जन्मदिनमा चकलेट बाँड्ने विद्यार्थीलाई कारबाही गरिने प्रधानाध्यापक भण्डारीले बताए। पत्रु खाना लैजान नपाइने भएपछि विद्यार्थीले घरमै तयार पारेका रोटी, मकै, भटमासलगायतका खाजा झोलामा बोकेर स्कुलमा आउने गरेका छन्।