कञ्चनपुर : जिल्ला प्रहरी कार्यालय कञ्चनपुरको हिरासतमा रहेका चार जना बिरामी परेका छन्। कञ्चनपुर खोका छाप्रा तथा उद्धार समितिको आयोजनामा प्रशासनमा ज्ञापनपत्र बुझाउन जाने क्रममा बिहीबार पक्राउ परेका चार जना बिरामी परेका हुन्।

बिरामी परेका ६५ वर्षीय रामनाथ योगी, ७९ वर्षीय कमलापति भट्ट, ७७ वर्षीय प्रताप धाँमी र ६९ वर्षीय मन्दिर विष्टलाई जिल्ला प्रहरी कार्यालयले महाकाली अञ्चल अस्पतालमा उपचार गरेको छ।

चिसोका कारण उनीहररू बिरामी परेका महाकाली अञ्चल अस्पतालले जनाएको छ। महाकाली अञ्चल अस्पतालका डा. वैभव भट्टले चारै जनाको उपचार गरिएको बताए।

डा. भट्टका अनुसार रामनाथ योगीको मुटुको शल्यक्रिया गरिएकाले उहाँलाई चिसोबाट बचाउनुपर्ने देखिएको छ।

भट्टलाई ग्याष्ट्रिक, धाँमीको श्वासप्रश्वासमा समस्या र विष्टको टाउको दुखेको चिकित्सक भट्टको भनाइ छ। डा. भट्टले चारै जनालाई न्यानो ठाउँमा राख्नुपर्ने सुझाव दिएका छन्।