लहान : स्वास्थ्यमन्त्री उपेन्द्र यादवले  सिरहाको लहानस्थित रामप्रसाद उमा स्मारक अस्पताललाई चाँडै ‘सेकेण्डरी’ तहको बनाउने घोषणा गरेका छन्।

बिहीबार बिहान अस्पताल निरीक्षण गर्दै मन्त्री यादवले अस्पतालमा कमी रहेको विशेषज्ञ चिकित्सक, दक्ष जनशक्ति र भौतिक उपकरण छिट्टै पठाउने आश्वासन दिए। अब शय्याका आधारमा नभई तहका आधारमा अस्पतालको वर्गीकरण गरिने जानकारी दिए।

अब अस्पतालहरू ‘प्राइमरी’, ‘सेकेण्डरी’ र ‘ट्रोसियल’ गरी तीन तहमा वर्गीकरण गरी सोही अनुसारको अस्पतालहरूको विस्तार गरिने उनले बताए। कमीकमजोरीलाई तत्काल सुधार गरी जनतालाई भरपर्दो र गुणस्तरीय स्वास्थ्य सेवा प्रदान गर्न अस्पताल प्रशासनलाई मन्त्री यादवले निर्देशन दिए।

अस्पताल निरीक्षणका क्रममा अस्पतालका मेसु डा. सुनिलकुमार कुशवाहाले अस्पतालको अवस्था र जनशक्तिबारे उपप्रधानमन्त्री यादवलाई जानकारी गराए।