राँझा बाँकेको जानकी गाउँपालिका–४ स्थित बेलहरी स्वास्थ्यचौकी आफैँ अस्वस्थ देखिएको छ।

स्वास्थ्य चौकीको भौतिक पूर्वाधारको कुरा त परै जाओस् बिरामी जाँच गर्ने कोठासमेत छैन। जाँच गर्न आउने बिरामीले बाहिरै पालो पर्खिनुपर्ने अवस्था छ।

यहाँ उपचारका लागि आउने बिरामीलाई औषधिसँगै पिउने पानीको व्यवस्थासमेत छैन। स्वास्थ्यचौकीमा न्यूनतम आधारभूत सेवासमेत उपलब्ध नभएको स्वास्थ्यचौकीका प्रमुख अहेव टामलाल बेल्बासेले बताए। वडा कार्यालयमा पटक–पटक जानकारी गराए पनि सुनुवाइ नभएको उनले बताए।

विगतमा जिल्ला जनस्वास्थ्य कार्यालयबाट विगतमा बाहिरङ्ग सेवा सञ्चालनका लागि रकम आउने भए पनि स्वास्थ्य संस्था स्थानीय तहमा हस्तान्तरण भएपछि आयस्रोत पनि ठप्प भएको छ।

गाउँपालिकाका स्वास्थ्य शाखा संयोजक गीरबहादुर गुरुङले मसलन्द खर्चका लागि गाउँपालिकामा रकम माग गरिएको र उपलब्ध भए स्वास्थ्यचौकी सञ्चालनमा सहजता आउने बताए।