रुकुम पश्चिम : विषाक्त रक्सी खाँदा तीनजनाको मृत्यु भएको छ।

सानीभेरी गाउँपालिका– ९ मगरराङजाका ६३ वर्षीय खम्बु कामी, मुसिकोट नगरपालिका– ११ लहुँ भलाक्चाका ५४ वर्षीय कमानसिंह सार्की र मुसिकोट नगरपालिका १२ नयाँ गाउँका २१ वर्षीय पलबहादुर विकको मृत्यु भएको जिल्ला प्रहरी कार्यालयले जनाएको छ।

‘मृतकले ओरेञ्ज नाम लेखिएको बजारमा पाइने रक्सी खाएर सुतेको पाइयो’, कार्यालयका प्रमुख प्रहरी नायब उपरीक्षक सुमित खड्काले भने, ‘यसबारेमा थप जानकारी भने शव परीक्षणपछि आउने छ।’

मुसिकोट नगरपालिका–१२ जुम्लावाङको एक विवाहमा सहभागी हुन आएका उनीहरू सोही ठाउँमै रक्सी सेवन गरी बेलुका सकुशल सुतेकामा बिहान मृत अवस्थामा फेला परेका थिए।

उनीहरुसँगै सुतेका अन्य दुईजना भने सकुशल छन्। घटनाको जानकारी पाएपछि जिल्ला प्रहरी प्रमुख एवं प्रहरी नायब उपरीक्षक खड्कासहित जिल्ला अस्पतालका चिकित्सकको टोली घटनास्थल पुगेको थियो।