नवलपरासी : पूर्वी नवलपरासीको गैँडाकोट नगरपालिकाले सुत्केरी आमा लक्षित ‘सुत्केरी आमा पोषिलो खाना’ कार्यक्रम ल्याएको छ। विपन्न समुदायलाई लक्ष्य गरी यो कार्यक्रम अघि बढाइएको हो।

गैँडाकोट नगर कार्यपालिकाले ‘सुत्केरी आमा पोषिलो खाना’ कार्यक्रमअन्तर्गत सुत्केरी आमालाई तीन हजार रुपैयाँ दिने निर्णय गरेको नगरपालिकाका उपप्रमुख विष्णुकुमारी कँडेलले जानकारी दिइन्।

नगरपालिकाले आफ्नो नगरक्षेत्रभित्र सत्केरी हुने आमालाई लक्षित गरी नीति तथा कार्यक्रममा लागू गरेको नगरपालिकाले जनाएको छ। यसका लागि सुत्केरी महिलाले पितौँजीघाट स्वास्थ्यचौकी र सहज सामुदायिक अस्पतालमा सुत्केरी गराएको हुनु पर्नेछ।

गैँडाकोट नगरपालिकाभित्रका दुई स्वास्थ्य संस्थामा चार पटक गर्भ परीक्षण र सुत्केरी भइसकेपछि तीन पटक स्वास्थ्य परीक्षण गराएका सुत्केरी आमाले सो सेवा प्राप्त गर्ने उपप्रमुख कँडेलको भनाइ छ ।

कँडेलका अनुसार यो सुविधाका लागि गैँडाकोट नगरभित्र बसोबास गरेका आमाले मात्र यो सुविधा प्राप्त गर्न सक्ने छन्।