काठमाडाैं : स्वास्थ्य तथा जनसंख्यामन्त्री उपेन्द्र यादवले आयुर्वेद विश्वविद्यालय स्थापनाका लागि सरकारले खाका बनाइरहेको बताएका छन्।

‘विगतमा जेजस्तो भए पनि अहिलेको सरकारले आयुर्वेद चिकित्सा पद्धतिलाई प्राथमिकतामा राखेको छ’, उनले भने, ‘प्रदेशपिच्छे आयुर्वेदिक ठूला औषधालय स्थापना गरिनेछ।’

धनवन्तरी जयन्ती तथा आरोग्य दिवसका अवसरमा नरदेवीमा आयोजित आयुर्वेद चिकित्सालय शतवार्षिकी उत्सवमा उनले जडिबुटी खेतीलाई प्रोत्साहन हुने खालका कार्यक्रम ल्याउने विश्वास दिलाए।

आयुर्वेद विभागका महानिर्देशक डा. वासुदेव उपाध्यायले सरकारले आयुर्वेदको क्षेत्रलाई सीमित बनाएको गुनासो गरे। ‘राज्यले चाहने हो भने विश्व स्वास्थ्य संगठनसँग मिलेर नसर्ने रोगको उपचारमा अायुर्वेदबाट धेरै गर्न सकिन्छ’, उनले भने।

जीवनशैली सुधार, खानपानमा नियन्त्रण आदि आयुर्वेदका विविध पक्ष अहिले विश्वले नै अँगालिरहेको उनको भनाइ छ। कार्यक्रममा चिकित्सालयका पूर्व कर्मचारीहरूलार्इ सम्मान गरिएकाे थियाे।

‘स्वास्थ्य र समृद्धिको आधार, आयुर्वेदको उपचार’ को नारासहित चिकित्सालयले शतवार्षिकी उत्सव मनाएको हो।