धनुषा : बलात्कारको घटनामा झुटो मेडिकल रिपोर्ट दिएका दुर्इ चिकित्सकविरुद्ध कारबाही प्रक्रिया अगाडि बढाउँदा नेपाल चिकित्सक संघ जनकपुर अञ्चल शाखाले आपत्ति जनाएको छ।

बलात्कारको घटनामा झुटो मेडिकल रिपोर्ट दिने डाक्टरलाई पक्राउ गरेर अख्तियार दुरुपयोग अनुसन्धान आयोगले भ्रष्टाचारको मुद्दा दर्ता गरेपछि नेपाल चिकित्सक संघले आपत्ति जनाउँदै आन्दोलनको चेतावनी दिएको हो।

बलात्कारको मुद्दामा झुटो रिपोर्ट दिएको आरोप लागेका चिकित्सक डा. विजयकुमार सिंह र डा. रम्भा गोइतलाई अविलम्ब रिहाइ गर्न माग गरेको छ। उनीहरूलाई रिहाइ नगरे कडा कदम चाल्न बाध्य हुने र त्यसबाट बिरामीमा पर्न जाने क्षतिको जिम्मेवार सम्बन्धित निकाय नै हुने विज्ञप्तिमार्फत चेतावनी दिएको छ।

गत शुक्रबार अख्तियारले जनकपुर अञ्चल अस्पतालका डा. विजयकुमार सिंह र डा. रम्भा गोइतविरुद्ध सरकारी चिकित्सकको पदको दुरुपयोग गरी भ्रष्टाचार गरेकाले हदैसम्म जेल सजाय माग गर्दै मुद्दा दायर गरेको हो।

इलाका प्रहरी कार्यालय, खजुरी धनुषाले गरेको अनुसन्धानअनुसार एक १२ वर्षीया बालिकाको बलात्कारसम्बन्धी स्वास्थ्य परीक्षणमा झुटो रिपोर्ट दिएको आरोपमा उनीहरूलाई निलम्बन गर्नुका साथै लाइसेन्ससमेत रोक्का गरिएको छ।