काठमाडौं : संसद्को शिक्षा तथा स्वास्थ्य समितिअन्तर्गत चिकित्सा शिक्षा विधेयकमाथि छलफल गर्न बनेको उपसमिति बैठकमा सांसदहरू नै अनुपस्थित भएका छन् ।

बिहीबार बिहान सवा १० बजे बोलाइएको बैठकमा सांसदहरु नआएपछि आगामी मंसिर २ गते सम्मलाई स्थगन गरिएको छ। बैठकमा छलफलका लागि शिक्षामन्त्री गिरिराजमणि पोखरेल उपस्थित थिए। उनी झण्डै एक घण्टा सिंहदरबारस्थित समितिको कार्यालयमा सांसदहरूलाई कुरेर मन्त्रालय फर्केका हुन्।

विधेयकमाथि छलफल गर्न मन्त्रीलाई डाकेर सांसद्हरू नै नआएका हुन्। बैठकमा सहभागी हुन उपसमितिका सदस्य सांसदहरू खगराज अधिकारी र एकवाल मियाँ मात्र आएका थिए।

सांसदहरु , गगनकुमार थापा, चित्रलेखा यादव अञ्जना विंशेखे, भैरवबहादुर सिंह, योगेशकुमार भट्टराई, सन्तकुमार थारु, हितबहादुर तामाङ र उमाकान्त चौधरी बैठकमा आएनन्। उनीहरूलाई बैठकमा आउन बुधबार नै समितिको कार्यालयले खबर गरेको थियो।

चिकित्सा शिक्षा विधेयक माथि छलफल गरि प्रतिवेदन तयार पार्न समितिले ११ सदस्यीय समिति गठन गरेको छ। उपसमितिका पाँच सदस्य बुधबारकै बैठकमा उपस्थित थिए। उनीहरूकै सल्लाहअनुसार बिहीबार बिहानलाई बैठक डाकिएको थियो।