काठमाडाैं : पतञ्जली योगपीठले नेपालमा आयुर्वेद तथा योग विश्वविद्यालय स्थापना गर्ने भएको छ। पतञ्जली योगपीठ नेपालका अध्यक्ष एवं प्रबन्ध निर्देशक आयुर्वेद शिरोमणि आचार्य बालकृष्णले नेपालमा आयुर्वेद तथा योग विश्वविद्यालय स्थापना गर्न लागेकाे जानकारी दिएका हुन्।

मण्डिखाटारस्थित केन्द्रीय कार्यालयमा बुधबार पत्रकार सम्मेलन गरी बालकृष्णले नेपालमा आयुर्वेद तथा योगसम्बन्धी अध्ययन, अनुसन्धानका लागि विश्वविद्यालय स्थापना गर्नका लागि सम्बन्धित मन्त्रालयसँग छलफल भइसकेको जानकारी दिए।

प्रतिभाशाली बालबालिकाहरूलाई अघि बढाउन नेपालमा स्पोर्टस् विद्यालय स्थापना गर्ने सोच पनि बनाएको अध्यक्ष बालकृष्णले बताए। नेपाली मूलका आचार्य बालकृष्णले पतञ्जली योगपीठले नेपाललाई आयुर्वेद र योगको माध्यामबाट समृद्ध र स्वच्थ बनाउन चाहेको पनि बताए। बालकृष्णले नेपालमा जडिबुटी खेती गरेर नेपालमा  रोजगारीको पर्याप्त अवसर सृजना गर्न केन्द्रित रहेको दाबी गरे।