महोत्तरी : पिउने पानीमा दिसामा पाइने ब्याक्टेरिया इकोलाई र कोलिफर्मका कारण जलेश्वर नगरपालिका–१२ नैन्ही गाउँमा तीन सातादेखि झाडापखाला फैलिएको पत्ता लागेको छ।

नैन्ही गाउँका मुस्लिम बस्तीमा  स्थानीयवासी प्रभावित हुने गरी फैलिएको झाडापखालाको कारण खाेज्न जिल्ला स्वास्थ्य कार्यालयका स्वास्थ्य टोलीले  पानीको नमूना राष्ट्रिय जनस्वास्थ्य प्रयोगशाला टेकु, काठमाडौँमा पठाएकाे थियाे। ल्याब परीक्षणका क्रममा स्थानीयवासीले पिउने पानीको एउटै स्रोत चापाकलमा दिसा मिसिएको पाइयाे।

त्यहाँका बासिन्दालार्इ त्याे चापाकलबाट पानी नखान र अन्य स्रोत खोजेर खान सल्लाह दिइएको जिल्ला स्वास्थ्य कार्यालय महोत्तरीका जनस्वास्थ्य निरीक्षक सन्तोषकुमार ठाकुरले बताए।

नैन्ही गाउँमा भदौ २९ गते एकैसाथ ४१ जनामा पखाला शुरु भएर ३०० जनाभन्दा बढी मानिसमा फैलिएको थियो भने एक बालिका र एक वृद्धाकाे मृत्यु भएको थियो । अहिले त्यहाँको पखाला नियन्त्रणमा आएको र स्वास्थ्य शिविर सञ्चालनमा राखेर बिरामीको उपचार भइरहेको जिल्ला स्वाथ्य कार्यालयका प्रमुख राजीव झाले जानकारी दिए।