उदयपुर : कटारी अस्पतालका तीन चिकित्सक एकैपटक बाहिर गएपछि बिरामीको उपचारमा समस्या भएको छ। अस्पतालमा जनशक्ति अभाव भएपछि बिरामीलाई निजी क्लिनिकमा महँगो खर्चमा उपचार गराउन बाध्य भएको कटारी रिस्कु–३ की कुमारी दनुवारले बताइन्।

‘तीन डाक्टर अन्यत्र गए, दुईजना यसअघि नै सरुवा लिएर अन्यत्र गए’, अस्पतालका प्रमुख डा. गौरव साहले भने ‘एक जना करारका डाक्टरले सरकारीमा नाम निकालेर अन्यत्र गएपछि अहिले अस्पताल सञ्चालन गर्न मुस्किल परेको छ।’

डाक्टर हिँडेपछि बिरामीको चाप थेगिनसक्नु भएको र सम्बन्धित मन्त्रालय तथा विभागमा समेत जानकारी गराए पनि अहिलेसम्म सुनुवाइ नभएको डा. साहले जानकारी दिए। कटारी अस्पतालमा उदयपुरको पश्चिमी क्षेत्र, दक्षिणी ओखलढुङ्गा क्षेत्र र पूर्वी सिन्धुली क्षेत्रदेखि बिरामी ठूलो सङ्ख्यामा उपचारका लागि आउने गरेको अस्पतालका कर्मचारी बताउँछन् ।