काठमाडाैं : चिकित्सा शिक्षामा सुधारको माग गर्दै २१ दिनदेखि आमरण अनशनरत चिकित्सक डा. गोविन्द केसी पक्ष र नेपाल सरकारबीचको वार्ता अनिश्चित भएको छ। जुम्लाको कर्णाली स्वास्थ्य विज्ञान प्रतिष्ठानमा २० दिनसम्म अनशन बसेका केसीलाई हाल महाराजगञ्जस्थित त्रिवि शिक्षण अस्पतालमा राखिएको छ।

शुक्रबार २१ दिन पनि उनले अनशन जारी राखेका छन्। स्वास्थ्य अवस्था खराब भएपछि जीवनरक्षा र उपचारका लागि भन्दै बिहीबार हेलिकोप्टरबाट काठमाडौं ल्याइए पनि उनकाे मागका सम्बन्धमा वार्ताबारे अन्योल देखिएको छ।

उनीसँग थप वार्ताबारे छलफल भए पनि अर्को निर्णय भइनसकेको शिक्षा, विज्ञान तथा प्रविधिमन्त्री गिरिराजमणि पोखरेलले बताए। यसअघि केसी पक्षले प्रतिनिधिसभामा दर्ता भएको चिकित्सा शिक्षा विधेयक फिर्ता हुनुपर्ने अडान राखेको र सरकार त्यसमा सहमत नभएपछि वार्ता स्थगन भएको हो। डा. केसीले अधिकारसहितको वार्ता टोलीको पनि माग गर्नुभएको छ।

सरकारले शिक्षा मन्त्रालयका सचिव खगराज बरालको संयोजकत्वमा तीन सदस्यीय वार्ता टोली गठन गरेको थियो । डा. केसी र प्रमुख प्रतिपक्षी नेपाली कांग्रेसको अघिल्लो सरकारले ल्याएको १० वर्षसम्म काठमाडौं उपत्यकामा नयाँ मेडिकल कलेजको सम्बन्धन रोक्काको व्यवस्था भएको चिकित्सा शिक्षा अध्यादेशको मर्मअनुसार नै विधेयक आउनुपर्ने अडान छ भने सरकार विधेयकलाई संसदीय प्रक्रियाबाट टुंगो लगाउने पक्षमा छ।