हेल्थ टिभी अनलाइन\काठमाडौं : बहालमा बसिरहेका चिकित्सक तथा स्वास्थ्यकर्मीलाई कोठा खाली गर्न दबाब दिने घर मालिकलाई सरकारले कारबाही गर्ने भएको छ।

स्वास्थ्य मन्त्रालयद्वारा मंगलवार आयोजित नियमित पत्रकार सम्मेलनमा स्वास्थ्यमन्त्री भानुभक्त ढकालका विज्ञ सल्लाहकार डा. खेम कार्कीले चिकित्सक र नर्सलाई घरमालिकले कोठा छोड्न भनेको भन्ने सुन्नमा आएको भन्दै त्यस्तो परिस्थिति आए स्थानीय प्रशासनलाई जानकारी गराउन आग्रह गरे।

विदेशबाट आएका केहीमा बाहेक अहिलेसम्म नेपालीमा संक्रमण नदेखिएको अवस्था छ’, उनले भने, ‘यस्तो वेला स्वास्थ्यकर्मीलाई घर छाड्न दबाब दिनु सामाजिक अपराध हो।’ कसैले यस्तो गरे प्रशासनमा उजुरी गर्न उनले सुझाव दिए। त्यस्ता घर मालिकलाई पहिलो चरणमा सम्झाउने र त्यसपछि पनि अटेर गरे कारबाही गर्ने चेतावनी उनले दिए।

डा. कार्कीले व्यक्तिगत सुरक्षा सामग्री (पीपीई) सही ढंगले प्रयोग गर्न स्वास्थ्यकर्मीलाई आग्रह गरे। ‘कोरोना संक्रमितको उपचारमा अत्यन्तै महत्त्वपूर्ण सामग्री गतल ढंगले प्रयोग नगर्नुस्’, उनले भने। पीपीई लगाएर स्वास्थ्यकर्मीले सामूहिक तस्वीर खिचाएको फोटो सामाजिक सञ्जालमा आएको भन्दै उनले त्यसो नगर्न आग्रह गरे।

पाँच मिनेटमा नै कोरोना परीक्षण गर्न सकिने भन्दै प्रचार गरिएको ‘र्यापिड टेस्ट किट’ विश्वसनिय नभएको उनले बताए। ‘विश्व स्वास्थ्य संगठनले प्रयोग नगर्नु भनेर निर्देशन दिएको छ’, उनले भने, ‘त्यस्ता भ्रमपूर्ण प्रचारमा विश्वास नगर्नुस्।’

कोरोना संक्रमणबाट बच्न लकडाउन गरिएको स्मरण गराउँदै उनले व्यक्तिगत दूरी कायम राखी खेतीपाती, घाँसपात र गाईवस्तु चराउन मिल्ने स्पष्ट पारे।

हेल्थ टिभी अनलाइन \काठमाडौं:  नेपालमा हालसम्म ५ जनामा मात्र कोरोना भाइरसको संक्रमण पुष्टि भएको छ । ती मध्ये एक जना निको भएर घर गइसकेका छन् भने ४ जना आइसोलेसनमा उपचाररत छन्।

मंगलबार बिहानसम्म १ हजार ६० जना व्यक्तिमा कोरोना भाइरसको नमुना परीक्षण गरिएको स्वास्थ्य मन्त्रालयले जनाएको छ । मन्त्रालयका प्रवक्ता डा विकास देवकोटाले भने, ‘हालसम्म १ हजार ६० जनामा कोरोना परीक्षण गर्दा पुरानै ५ जनामा बाहेक अन्यमा संक्रमण नेगेटिभ आएको छ । यो हाम्रा लागि खुशीको कुरा हो ।’

स्वास्थ्य मन्त्रालयलले नमुना परीक्षणको दायरा फराकिलो बनाउँदै प्रत्येक प्रदेशबाट नमुना परीक्षण शुरु गर्न लागेको पनि उनले जानकारी दिए । आजको मितिसम्म  टेकुस्थित शुक्रराज ट्रपिकल तथा सरुवा रोग अस्पतालमा १० जना आइसोलेसनमा रहेको पनि उनले जानकारी दिए । यसैगरी ७७ जना कोरोनाको आशंकामा प्रदेशका विभिन्न अस्पतालमा आइसोलेसनमा रहेको पनि उनले बताए ।

डा देवकोटाले शुरुका दुई जना संक्रमितका आफन्त र नजिकबाट सम्पर्कमा आएकाहरुको पहिचान भइसकेको र उनीहरुकलाई होम क्वारेन्टाइनमा राखिएको भनदै पछिल्लो दुई जना संक्रमितको सम्पर्कमा आएकाको पनि ८० प्रतिशत पहिचान भइसकेको जानकारी दिए । उनले लकडाउनलाई पालना गर्दै कोरोना रोकथाम र नियन्त्रणमा सबैलाई सहयोग गरिदिन आग्रह समेत गरे ।