हेल्थ टिभी अनलाइन\डडेल्धुरा : डडेल्धुराका कोरोना संक्रमित युवकले कोरोनालाई जितेर आज अस्पतालबाट डिस्चार्ज हुँदै छन्। परशुराम नगरपालिका- १० का २८ वर्षीय युवकले कोरोना जितेका हुन्।

धनगढीस्थित सेती प्रादेशिक अस्पतालको प्रयोगशालामा गरिएको परीक्षणमा दुई पटक रिपोर्ट नेगेटिभ आएपछि उनलाई डिस्चार्ज गर्न लागिएको हो।

ती युवकको दुई पटक कोरोना रिपोर्ट नेगेटिभ आएपछि उनलाई डिस्चार्ज गर्न लागिएको डडेल्धुरा अस्पतालका निमित्त मेडिकल सुपरिटेन्डेन्ट डा जगदीशचन्द्र विष्टले जानकारी दिए।

सरकारी कर्मचारीसमेत रहेका ती युवकमा गत जेठ ९ गते कोरोनाको संक्रमण पुष्टि भएको थियो। डडेल्धुरा अस्पतालको आइसोलेसनमा उपचाररत युवकले १० दिनमै कोरोना जितेका हुन्।

योसँगै सुदूरपश्चिममा कोरोनाको संक्रमणबाट मुक्त हुनेको संख्या ६ पुगेको छ। यसअघि यहाँका पाँच जनाले कोरोना जितेर घर फर्किसकेका छन्।

हेल्थ टिभी अनलाइन : विश्वभर कोरोना भाइरस संक्रमणबाट ३ लाख ७३ हजारभन्दा बढीको मृत्यु भएको छ । वर्ल्डोमिटरका अनुसार संक्रमित हुनेको संख्या ६२ लाख ६३ हजार नाघेको छ । विश्वभर २८ लाख ४६ हजारभन्दा बढी संक्रमित उपचारपछि निको भएर घर फर्किएका छन् ।

सबैभन्दा बढी अमेरिका प्रभावित बनेको छ । अमेरिकामा संक्रमितको संख्या १८ लाख ३७ हजार नाघेको छ । त्यहाँ १ लाख ६ हजार भन्दा बढीले ज्यान गुमाइसकेका छन् । अमेरिकापछि संक्रमितको संख्या ब्राजिलमा बढी रहेको छ । त्यहाँ संक्रमितको संख्या ५ लाख नाघेको छ भने २८ हजार ८ सयभन्दा बढीले ज्यान गुमाइसकेका छन् ।हालसम्म बेलायतमा ३८ हजार १ सय, इटलीमा ३३ हजार ३ सय, स्पेनमा २७ हजार १ सय र फ्रान्समा २८ हजार ७ सयभन्दा बढीले ज्यान गुमाएका छन् । रुसमा संक्रमितको संख्या चार लाख ५ हजार नाघेको छ भने ४ हजार ७ सयभन्दा बढीले ज्यान गुमाइसकेका छन् ।

यसैगरी भारतमा पनि संक्रमितको संख्या तिब्र रुपमा बढिरहेको छ । भारतमा संक्रमितको संख्या एक लाख ९० हजार नाघेको छ भने ५ हजार ४ सय ८ जनाले ज्यान गुमाएका छन् । पाकिस्तानमा पनि संक्रमितको संख्या ६९ हजार ४ सय नाघेको छ । त्यहाँ १ हजार ४ सय ८३ जनाले ज्यान गुमाएका छन् । नेपालमा हालसम्म १ हजार ५ सय ६७ जनामा संक्रमण पुष्टि भएको छ भने ८ जनाले ज्यान गुमाएका छन्।