हेल्थ टिभी अनलाइन\डडेल्धुरा:  सुदूरपश्चिम प्रदेशमा थप ६ जनामा कोरोना पुष्टि भएको छ। शुक्रबार धनगढीस्थित सेती प्रादेशिक अस्पतालको प्रयोगशालामा गरिएको परीक्षणमा थप ६ जनामा कोरोना पुष्टि भएको हो। यो सँगै सुदूरपश्चिममा कोरोना संक्रमितको संख्या ९२ पुगेको छ।

आज कोरोना पुष्टि हुने संक्रमित मध्ये ५ जना डडेल्धुराका र १ जना कैलालीका रहेका छन्। कोरोना संक्रमित देखिनेहरुमा डडेल्धुराको गन्यापधुरा गाउँपालिका–१ का ३८ र १७ वर्षका पुरुष, वडा नम्बर २ का २४, १९ र ५७ वर्षका पुरुष रहेका छन् भने कैलालीको जानकी गाउँपालिका–७का १६ वर्षिय पुरुष रहेको सेती प्रादेशिक अस्पतालका सूचना अधिकारी दिलीपकुमार श्रेष्ठले जानकारी दिए।

यसअघि सुदूरपश्चिममा बिहीबार ५ जनामा कोरोना पुष्टि भएको थियो। सुदूरपश्चिमका ९२ जना संक्रमित मध्ये ८८ जना प्रदेशभित्रै रहेका छन् भने बझाङ र बाजुराका १÷१ संक्रमितको भने कर्णाली प्रदेशमा उपचार भइरहेको छ। यहाँका एकजना संक्रमितको मृत्यु भइसकेको छ भने ७ जना प्रदेशभित्रबाटै निको भएर घर फर्किसकेका छन्।

हेल्थ टिभी अनलाइन\ काठमाडौं : जुम्लामा पनि क्वारेन्टाइनमा बसेका एक वृद्धको मृत्यु भएको छ। चन्दननाथ नगरपालिका–८ धुपीढुस्का माध्यमिक विद्यालय तलिउममा क्वारेन्टाइनमा बसेका ६५ वर्षीय वृद्धको बिहीबार राती मृत्यु भएको हो।

जिल्ला प्रहरी कार्यालय जुम्लाका अनुसार मृतक वृद्ध यही जेठ २१ गते बर्दियाबाट आएर क्वारेन्टाइन बसेका थिए। उनको मृत्यु भएपछि कर्णाली स्वास्थ्य विज्ञान प्रतिष्ठान जुम्लाको स्वास्थ्यकर्मी टोलीले स्वाब संकलन गरेर परीक्षणका लागि पठाएको छ। मृतक दमको रोगी भएको बताइएको छ । जुम्लामा क्वारेन्टाइनमै मृत्यु भएको यो पहिलो घटना हो।