हेल्थ टिभी अनलाइन:  कोरोना भाइरसको संक्रमणका कारण विश्वमा ज्यान गुमाउनेको संख्या ४ लाख ७९ हजार नाघेको छ । वर्ल्डोमीटरका अनुसार बुधबार बिहानसम्म कोरोनाका कारण विश्वमा हालसम्म ज्यान गुमाउनेको संख्या ४ लाख ७९ हजार ८१६ पुगेको छ । यसैगरी संक्रमितको संख्या ९३ लाख ५४ हजार ३२६ पुगेको छ ।

कोरोनाले सबैभन्दा धेरै ज्यान गुमाउने देशको सूचीमा अमेरिका पहिलो नम्बरमा छ । अमेरिकामा मात्रै १ लाख २३ हजार ४७३ जनाले कोरोनाबाट ज्यान गुमाएका छन्। दोस्रोमा ब्राजिल छ भने तेस्रोमा बेलायत, चौथोमा इटली तथा पाचौंमा स्पेन रहेको छ । संक्रमित धेरै भएको देशमा भने भारत चौंथो नंबरमा परेको छ । त्यहाँ बुधबार बिहानसम्म ४ लाख ५६ हजार ६२ जनामा कोरोना पुष्टि भएको छ ।

चीनको वुहानबाट फैलिएको कोरोना भाइरसको संक्रमण विश्वका २१६ देशमा फैलिसकेको विश्व स्वास्थ्य संगठनले जनाएको छ ।

हेल्थ टिभी अनलाइन\काठमाडौं: गण्डकी प्रदेशमा आज साँझ थप १०४ जनामा कोरोना संक्रमण पुष्टि भएको छ ।

गण्डकी प्रदेशको स्वास्थ्य निर्देशनालयले विज्ञप्ति जारी गर्दै आज ७ जिल्ला गरी १०४ जनामा कोरोना पुष्टि भएको जनाएको हो । योसँगै गण्डकी प्रदेशमा कोरोना संक्रमितको संख्या ६९७ पुगेको छ । आज संक्रमण पुष्टि हुनेहरुमा राष्ट्रिय जनस्वास्थ्य प्रयोगशाला काठमाडौंमा गरिएको परीक्षणमा बाग्लुङका ६ जना, कास्कीका ७ जना, पर्वतका २१ जना नवलपरासी बर्दघाट सुस्ता पूर्वका २१ जना, तनहुँका १ जना,स्याङ्जाका १३ जना रहेका छन्।

पोखरा स्वास्थ्य विज्ञान प्रतिष्ठान र राष्ट्रिय जनस्वास्थ्य प्रयोगशालामा गरिएको परीक्षणमा गोराखाका १८ जनामा कोरोना संक्रमण देखिएको छ । यसैगरी भरतपुर अस्पतालमा गरिएको परीक्षणमा नवलपुर बर्दघाट सुस्ता पूर्वका १७ जनामा पनि कोरोना पुष्टि भएको निर्देशनालयले जनाएको छ । निर्देशनालयका अनुसार उनीहरुलाई सम्बन्धित जिल्लाको आइसोलेसनमा राखिनेछ ।