हेल्थ टिभी अनलाइन \चितवन :  चितवनमा शनिबार ६ वर्षीय बालकदेखि प्रहरी र थुनुवासम्मलाई कोरोना संक्रमण पुष्टि भएको छ ।

भरतपुर अस्पताल कोभिड–१९ परीक्षण प्रयोगशालामा गरिएको परीक्षणमा चितवनका ६ जनासहित ८ जनामा कोरोना संक्रमण पुष्टि भएको छ । अस्पतालले विज्ञप्ति जारी गर्दै गत २४ घण्टामा ६९ जनाको नमुना परीक्षण गरिएकोमा ८ जनामा कोरोना पुष्टि भएको जानकारी दिएको छ ।

संक्रमण पुष्टि हुनेहरुमा भरतपुरमा कार्यरत प्रहरी र थुनुवा समेत रहेका छन्। यसैगरी भरतपुरका ६ वर्षका बालकमा पनि संक्रमण देखिएको छ भने अस्पतालमा उपचाररत बिरामी पनि रहेको अस्पतालले विज्ञप्ति मार्फत जानकारी दिएको छ ।

हेल्थ टिभी अनलाइन\ काठमाडौं : सरकारी चिकित्सक संघ (गोदान) को अध्यक्षमा डा रबिन खड्का विजयी भएका छन्।

संघको आज शनिबार अनलाइन माध्यमबाट भएको मतदानमा डा खड्काले ४८० मत ल्याएर अर्का प्रत्यासी डा समाज गौतमलाई पछि पारेका हुन् । उनका प्रतिस्पर्धी डा गौतमले २३७ मत ल्याएका छन्।

संघको वरिष्ठ उपाध्यक्षमा डा विजय थापा विजयी भएका छन्। थापाले ४३९ मत ल्याएका छन्। उनका प्रतिस्पर्धी डा राम प्रसाद सापकोटाको २६८ मत आएको छ।

यसैगरी उपाध्यक्षमा डा सुशील मोहन भट्टराई विजयी भएका छन्। यस्तै महासचिवमा डा किर्तिपाल सुवेदी ४०९ मत ल्याएर विजयी भएका छन्।

सचिवमा डा रोशन भगद ४२८ मत ल्याएर साथ विजयी भएका छन् । यसैगरी कोषाध्यक्षमा डा सुधा साही ५०३ मतका साथ विजयी भएकी छन् । कुल ७६८ मतदातामध्ये ७२३ जनाले मतदान गरेको निर्वाचन समितिले जनाएको छ । मतदान बिहान ७ बजेदेखि ५ बजेसम्म गरिएको थियो ।