हेल्थ टिभी अनलाइन : नेपालमा पहिलोपटक ४० देशका आ-आफनो देशमा स्थापित वरिष्ठ युरोलोजिष्टहरु एकैपटक भेला पारेर सम्मेलन सम्पन्न भएको छ ।

खड्गी इन्स्टिच्युट अफ इन्डोयुरोलोजी (आरुस लाइफस्टाइल अस्पताल) को मुख्य आयोजनामा काठमाडौंमा सम्पन्न भएको मिर्गौलाको पत्थरी निकाल्ने अत्याधुनिक प्रविधि मिनी पीसीएनएल सम्बन्धी अन्तराष्ट्रिय सम्मेलनमा भाग लिन ४० देशका विज्ञहरु आएका थिए । यही अक्टोबर ११ र १२ तारिखमा काठमाडौंंको याक एण्ड यति होटलमा सम्मेलन भएको हो । कार्यक्रमको उद्घाटन प्रमुख अतिथी नेपालकै वरिष्ठ युरालोजिस्ट प्राडा जगदीशलाल वैद्यले गरेका थिए ।

मुख्य आयोजक खड्गी इन्स्टिच्युट अफ इन्डोयुरोलोजीका मेडिकल डाइरेक्टर तथा वरिष्ठ युरोलोजिष्ट डा संजय खड्गीले यस खालको मिनी पीसीएनएल प्रविधि सम्बन्धी अन्तराष्ट्रिय सम्मेलन नेपालमा पहिलोपटक भव्यताकासाथ सम्पन्न भएको बताए । उनले भने, ‘यो सम्मेलनले हामी नेपाल पनि मिनी पीसीएनएल प्रविधिमा विश्वमै उत्कृट स्थानमा छ भन्ने जानकारी दिएको छ ।’

डा खड्गीले सम्मेलनमा १४ वटा मिर्गौला पत्थरीको अस्पतालको ओटी कक्षबाट लाइभ सर्जरी भएको र सो कुरा हलमा बस्ने सबैले प्रत्यक्ष रुपमा हेर्न र अवलोकन समेत गरेको जानकारी दिए । सम्मेलनमा अमेरिका, यूके, कुवेत, कतार, जर्मनी, बंगलादेश, भारत, श्रीलंका, यमन, दुबई लगायतका ४० देशका २ सय बढी विज्ञहरुको सहभागिता रहेको थियो भने मिर्गौला पत्थरी, प्रविधि लगायतका विविध २० वटा विषयमा प्रस्तुतीकरण रहेको थियो । सम्मेलनमा नेपालभरीबाट युरोलोजिष्टहरु सहभागी हुन काठमाडौं आएका थिए ।