हेल्थ टिभी अनलाइन : सुदर्शन देवकोटा स्मृति पाँचौं राष्ट्रिय स्वास्थ्य पत्रकारिता पुरस्कार गोरखापत्रका स्वास्थ्य पत्रकार सरोज ढुंगेलले पाएका छन् ।

पूर्व स्वास्थ्य तथा जनसंख्या मन्त्री पदम गिरी, सुदर्शन देवकोटा फाउण्डेशनकी अध्यक्ष डा सुधा देवकोटाले संयुक्त रुपमा ढुंगेललाई ३३ हजार ३३३ रुपैयाँ राशीको नगदसहित पुरस्कृत गरेका हुन् । स्वर्गीय सुदर्शन देवकोटाको १८औँ पुण्यतिथिको अवसर पारेर पुरस्कार हस्तान्तरण गरिएको हो । सारदा सुदर्शन देवकोटा फाउण्डेशनले पाँच वर्षदेखि स्वास्थ्य पत्रकार मञ्चसँगको सहकार्यमा उक्त पुरस्कार प्रदान गर्दै आइरहेको छ ।

पुरस्कार वितरण कार्यक्रममा पूर्व स्वास्थ्य मन्त्री पदम गिरीले स्वास्थ्य पत्रकारिताको महत्व अहिलेको अवस्थामा धेरै नै रहेको जिकीर गरे ।

स्वर्गीय पत्रकार देवकोटाकी छोरी तथा फाउण्डेशनकी अध्यक्ष डा सुधा देवकोटाले आफ्नो बुवाले पत्रकारितामा व्यतित गरेको समय स्मरण गर्दै पत्रकारितालाई थप जिम्मेवार र प्रभावकारी बनाउन यस पुरस्कार स्थापना गरेको बताइन्। उनले पत्रकारहरूले सत्यतथ्य छुट्याएर जिम्मेवार भएर समाचार लेख्न आवश्यक रहेको बताइन् ।

ढुंगेलले स्वास्थ्य पत्रकारितामार्फत समाजलाई स्वस्थ बनाउने अभियानमा लाग्न यो पुरस्कारले आफूलाई थप हौसला मिलेको प्रतिक्रिया दिए ।