हेल्थ टिभी अनलाइन : १८ वर्षदेखि ३८ वर्षका महिलामा थाइराइडको समस्या बढी देखिने गरेको बताइएको छ ।

शनिबार डाइबेटिज तथा इन्डोक्राइनोलोजी एशोसिएसन नेपाल (डीन) को आयाेजनामा गरिएको पत्रकार सम्मेलनका क्रममा विज्ञहरुले यस्तो बताएका हु्न ।

कार्यक्रममा बोल्दै डीनका कार्यकारी प्रमुख तथा इन्डोक्राइनोलोजिस्ट डा सन्तोष शाक्यले थाइराइडको समस्या महिलामा बढी देखिने र त्यो पनि १८ देखि ३८ वर्षका महिलामा बढी देखिने गरेको बताए । उनले भने, ‘हर्मोनका कारण महिलामा यो रोग बढी देखिन्छ । ८ जना महिलामा थाइराइड हुँदा एक जना मात्र पुरुषमा देखिन्छ यो समस्या ।’

यसैगरी कार्यक्रममा डीनका अध्यक्ष डा अमित शाक्यले थाइराइडको समस्यालाई लिएर धेरै नै भ्रमहरु रहेको जानकारी दिए । उनले थाइराइडमा काउली, बन्दा, गाजर जस्ता खानेकुरा खान हुन्न भन्ने व्यापक भ्रम रहेको भन्दै यो रोग खानासँग सम्बन्धित नरहेको प्रस्ट पारे र यसैगरी डीनका महासचिव डा भोजराज अधिकारीले थाइराइडलाई समयमै व्यवस्थापन गरेमा यो डराउन नपर्ने रोग भएको जिकीर गरे । यसलाई समयमै पहिचान गरेर नियन्त्रणमा राखेमा यसले केही बिगार नगर्ने समेत बताए ।

विश्वभर मे २५ मा विश्व थाइराइड दिवस मनाउने गरिन्छ ।